Gjykata Themelore në Prishtinë ka kërcënuar me ndërprerje të punës nëse nuk zgjidhet problemi me ujë të cilin po përballet për tri ditë.
Përmes një komunikate për media, është thënë se në këtë gjykatë ka mungesë të ujit qe tri ditë dhe kjo e ka vështirësuar punën e stafit.
“Kjo gjendje ka vështirësuar dhe rënduar gjendjen higjienike në objektet e Pallatit Drejtësisë, po ashtu vë në rrezik shëndetin e gjyqtarëve, stafit administrativ, të cilët pavarësisht kësaj gjendje të rëndë e cila është duke mbizotëruar në tërë objektin e gjykatës, të njëjtit janë duke vazhduar të punojnë”, thuhet aty.
Gjykata ka kërkuar nga autoritetet kompetente, KRU “Prishtina” dhe Ministria e Punëve të Brendshme, që të angazhohen në zgjidhjen e kësaj çështjeje dhe të marrin masa të menjëhershme për të furnizuar me ujë objektin e kësaj gjykate, “në të kundërtën do të shqyrtohet seriozisht mundësia e ndërprerjes së punës, me qëllim të parandalimit të përhapjes së ndonjë epidemie eventuale”.
