Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka njoftuar se ministria që ajo drejton ka dorëzuar sot tri lëndë në Prokurorinë Themelore në Prishtinë, duke kërkuar hetimin e dyshimeve për shpronësim dhe tjetërsim të kundërligjshëm të pronës publike.
Përmes një postimi në Facebook, Pacolli tha se mbrojtja e pronës publike është obligim institucional dhe përgjegjësi ndaj qytetarëve.
“Askush nuk mund të përfitojë në mënyrë të kundërligjshme në dëm të interesit publik”, ka deklaruar ajo.
Sipas Pacollit, Ministria e Mjedisit, Planifikimit Hapësinor dhe Infrastrukturës do të vazhdojë të ndërmarrë të gjitha veprimet ligjore për mbrojtjen e pronës publike dhe për të kërkuar llogaridhënie për çdo dyshim mbi keqpërdorimin e saj.
Ministrja nuk ka dhënë detaje shtesë lidhur me tri lëndët e dorëzuara apo rastet konkrete që janë referuar për hetim.
