Prishtinë- Prokuroria Speciale e Republikës së Kosovës (PSRK) konfirmon se në koordinim me Policinë e Kosovës, hetimet lidhur me rastin e krimeve të luftës në komunën e Zubin-Potokut, po vazhdojnë intensivisht, tashmë këto hetime po vazhdojnë në lokacionin e tretë.
Sipas Prokurorisë, mbetjet mortore të gjetura në Jabukë do t’i nënshtrohen ekzaminimeve mjeko-ligjore dhe analizave të ADN-së për identifikim, raporton “Betimi për Drejtësi“.
“Deri më tani, tre persona janë arrestuar nën dyshimin për kryerjen e veprës penale “Krime lufte kundër popullsisë civile”. Gjatë hetimeve janë kontrolluar disa lokacione. Në fshatin Jabukë janë gjetur mbetje të cilat do t’i nënshtrohen ekzaminimeve mjeko-ligjore dhe analizave të ADN-së për identifikim, ndërsa gërmimet në fshatin Kalludër e Vogël po vazhdojnë. Aktualisht, hetimet po vazhdojnë në një lokacion të tretë”, thuhet në njoftim.
PSRK bën të ditur se prokurorja përgjegjëse ishte në vendngjarje së bashku me hetuesit nga Drejtoria për Hetimin e Krimeve të Luftës dhe ekspertët forenzikë për të mbikëqyrur veprimet hetimore.
“Për shkak të fazës së ndjeshme të hetimit, Prokuroria Speciale nuk mund të japë informacione të mëtejshme në këtë moment. Informacione shtesë do të publikohen kur kjo të jetë e mundur pa cenuar hetimin”, u tha në njoftim.
Tre të dyshuarit që janë arrestuar lidhur me këtë rast, gjenden nën masën e paraburgimit.
Ndryshe, në Kalludër të Zubin-Potokut pas arrestimit të dy të dyshuarve të parë kanë nisur gërmime për mbetje mortore, të cilat janë identifikur si mbetje njerëzore por që procesi ende po vazhdon. Ndërkaq të dielën e 2 gushtit u bë e ditur se është identifikuar edhe një lokacion ku dyshohet se ka mbetje mortore. /BetimipërDrejtësi
