Pakënaqësitë me zgjatjen e grevës së organizuar nga SBAShK-ut vetëm sa po rriten. E kjo grevë po vlerësohet si tërësisht e papërgjegjshme dhe që me të janë shkelë me të dy këmbët mbi interesin në të mirë të fëmijëve, rrjedhimisht edhe Ligjin për mbrojtjen e fëmijëve dhe të drejtën e tyre kushtetuese.
Kështu konsideron analisti Dardan Velija, i cili ka theksuar se Kosova e ka një Ligj për mbrojtjen e fëmijës, i cili shumë qarte e specifikon se çdo veprim që ndërlidhet me fëmijët, qoftë nga prindërit apo institucionet, duhet te sigurojë – INTERESIN MË TË MIRË TË FËMIJËS.
“Greva një mujore – tërësisht e papërgjegjshme, e shkelë me të dy këmbët interesin më të mirë të fëmijëve dhe rrjedhimisht edhe këtë ligj. Ky ligj e specifikon gjithashtu shumë qartë që ndalohet privimi i fëmijës nga e drejta për edukim dhe arsim. Sindikata për një muaj i ka privuar fëmijët nga e drejta e tyre për edukim dhe arsim”, ka thënë Velija.
Ai thekson se ky ligj obligon prindërit ose kujdestarët që të marrin masa të përshtatshme që fëmija të ndjekë arsimin e detyrueshëm dhe të garantojë frekuentimin e rregullt në shkollë.
“Kjo i obligon prindërit që të organizohen dhe të marrin për sipër zbatimin e të drejtës së fëmijës për arsim, e cila është edhe e drejtë kushtetuese”, ka shkruar mes tjerash Velija.
Për më shumë në linkun më poshtë e keni të plotë: LIGJIN NR. 06/L-084 PËR MBROJTJEN E FËMIJËS
https://gzk.rks-gov.net/ActDocumentDetail.aspx?ActID=20844
Ndërkohë duke parë se greva po thyhet nga brenda dhe se shumica e mësimdhënësve po shprehen kundër grevës, drejtuesit e SBAShK-ut kanë nisur të pyesin shkollat nëse janë për të nisur ose jo mësimin më 3 tetor.
E tashmë kundër grevës dhe për mësim janë deklaruar edhe mësimdhënësit nga komuna e Podujevës dhe ajo e Prizrenit.
KosovaNews mëson se 80 për qind e shkollave nga komuna e Podujevës kanë votuar që të ndërpritet greva dhe të fillohet me procesin mësimor.
Po ashtu edhe shumica e mësimdhënësve nga shkollat në Prizren kanë votuar që mësimi të nis më 3 tetor.
Ndërkaq ka shkolla që tashmë kanë nisur mësimin, siç është “Hasan Prishtina”, në kryeqytet, ndërsa edhe disa shkolla në komuna tjera, si Gjakovë, Podujevë, Kaçanik e Deçan, kanë nisur mësimin.
E dje njëra nga shkolla që të vendosur që të ndërpritet greva dhe të fillohet me procesin mësimor është edhe shkolla “Ismail Qemaili, në Prishtinë.
KosovaNews mëson se nga votimi që është zhvilluar në këtë shkollë, 67 për qind kanë votuar që të fillojë mësimi të hënën, ndërsa vetëm 31 për qind kanë qenë për të vazhduar me grevë dhe pjesa tjetër nuk është deklaruar fare.
Edhe në SHFMU “Nexhmi Mustafa”, në Besi, shumica janë deklaruar që të ndërpritet greva dhe të fillohet me mësim.
Ndërsa Këshilli i Prindërve i Kosovës ka kërkuar edhe sot ndërprerjen e menjëhershme të grevës dhe nisjen e procesit mësimor, duke kërcënuar se në të kundërtën do të kërkojmë çregjistrim masiv të nxënësve.
Përmes një shkrimi në llogarinë e tyre në Facebook, ky këshill ka kërcënuar se nëse deri të hënën me datën 3 tetor nuk nis mësimi, do të kërkojmë çregjistrim masiv nga shkollat.
Sindikata e Bashkuar e Arsimit ka thënë, më 28 shtator, se i është drejtuar anëtarësisë greviste me një shkresë, përmes të cilës u ka kërkuar të japin mendimin e tyre për idenë që të pezullohet greva në arsim.
Si pasojë e grevave që kanë nisur në sektorin e arsimit më 25 gusht, mbi 300.000 nxënës kanë mbetur pa mësim.
Në fillim të këtij muaji, Qeveria e Kosovës ka paraqitur një pako për përballje me inflacionin, në kuadër të së cilës punonjësit e sektorit publik, përfshirë mësimdhënësit, përfitojnë nga 50 euro shtesë, nisur nga ky muaj./KosovaNews/