Këshilli i Prindërve i Kosovës e ka falënderuar sot UNICEF-in që bëri thirrje të ndërpritet greva e të hapen shkollat në Kosovë, ndërsa ka kërkuar që tani të vendoset e të nis procesi mësimor.
“I jemi mirënjohës organizatës UNICEF që ka kërkuar fillimin e menjëhershëm të procesit mësimor në Kosovë, duke sqaruar edhe dëmin e madh që po i bëhet të ardhmes së fëmijëve! Do të donim që reagime të tilla, në mbrojtje të së drejtës kushtetuese të fëmijëve tanë për edukim e arsimim publik, të kishim edhe nga organizata e përfaqësi të tjera ndërkombëtare që zakonisht reagojnë për çështje shumë më pak të rëndësishme”, thuhet në reagimin e Këshillit të Prindërve.
Si pasojë e grevave që kanë nisur në sektorin e arsimit më 25 gusht, mbi 300.000 nxënës kanë mbetur pa mësim.
Edhe në reagimin e sotëm në llogarinë e tyre në Facebook, Këshilli i Prindërve ka kërcënuar se mësimi të filloje ose do të bëjnë çregjistrim masiv nga shkollat.
“Hapini shkollat ose çregjistrohemi!”, thuhet në reagim.
Sindikata e Bashkuar e Arsimit ka thënë, më 28 shtator, se i është drejtuar anëtarësisë greviste me një shkresë, përmes të cilës u ka kërkuar të japin mendimin e tyre për idenë që të pezullohet greva në arsim.
Në fillim të këtij muaji, Qeveria e Kosovës ka paraqitur një pako për përballje me inflacionin, në kuadër të së cilës punonjësit e sektorit publik, përfshirë mësimdhënësit, përfitojnë nga 50 euro shtesë, nisur nga ky muaj./KosovaNews/
