Universiteti i Prishtinës “Hasan Prishtina” ka bërë të ditur të shtunën se më 3 tetor do të nis viti i ri akademik 2022/23.
“Mbi 4 mijë e 100 studentë të rinj i janë bashkuar UP-së këtë vit, në dhjetëra programe studimore, të ofruara në 14 njësi akademike. Universiteti i Prishtinës edhe sivjet ka vazhduar me tërheqjen e nxënësve më të dalluar në nivel vendi. Mbi 45% të studentëve të pranuar në UP në vitin e parë të studimeve themelore kanë notën mesatare 5.0 gjatë shkollës së mesme”, thuhet në njoftim.
Në njoftim thuhet po ashtu se ashtu sikur para një çerek shekulli, edhe sot, UP-ja është orientuese dhe baza kryesore e përgatitjes së intelektualëve të vendit.
“E thëna e para 25 vjetëve e rektorit Ejup Statovci se ‘Universiteti është me studentët dhe studentët janë të universitetit’ vazhdon të jetë udhëzuese e ideologjisë së UP-së”, thuhet më tej në njoftim.
Aktualisht në UP janë në proces edhe konkursi për pranimin e studentëve në studimet master dhe në ato të doktoratës.
