Organizata “Lëvizja për Demokraci” ka reaguar ndaj situatës në Universitetin Publik të Ferizajt “USHAF”, duke u bërë thirrje studentëve që të mos regjistrohen në këtë institucion, për shkak të asaj që e cilëson si shkelje të statutit dhe të ligjshmërisë në udhëheqjen e universitetit.
Sipas reagimit të kësaj organizate, rektori i universitetit, Agron Bajraktari, dyshohet se ka manipuluar statutin e universitetit në mënyrë që t’ia mundësojë vetes rizgjedhjen e vazhdueshme në krye të institucionit. Lëvizja për Demokraci pretendon se, ndryshe nga statutet e universiteteve të tjera publike në Kosovë, ku rektorit i lejohen vetëm dy mandate, në rastin e Universitetit të Ferizajt kjo është ndryshuar në kundërshtim me standardet dhe praktikat e zakonshme.
Organizata vlerëson se, nëse këto pretendime rezultojnë të sakta, pozita e rektorit mund të konsiderohet e jashtëligjshme dhe, si pasojë, edhe dokumentet zyrtare të nënshkruara prej tij, përfshirë diplomat, mund të jenë objekt kontestimi në të ardhmen.
Në reagim kërkohet që Ministria e Arsimit, Shkencës, Teknologjisë dhe Inovacionit të dalë urgjentisht me një sqarim publik lidhur me këtë çështje dhe të informojë opinionin për ligjshmërinë e mandatit të rektorit të Universitetit të Ferizajt.
Po ashtu, Lëvizja për Demokraci ka ngritur edhe shqetësime për stafin akademik të këtij universiteti, duke pretenduar se një pjesë e madhe e tyre janë pranuar pa kritere të qarta dhe se nuk përputhen profesionalisht me lëndët që ligjërojnë.
Deri më tani, Universiteti Publik i Ferizajt “USHAF” dhe rektori Agron Bajraktari nuk kanë reaguar publikisht ndaj këtyre pretendimeve.
