Është sulmuar dhe i është djegur vetura me targa RKS një pjesëtari të Policisë së Kosovës nga komuniteti serb.
Ky sulm ka ndodhur ë pjesën veriore të vendit dhe për këtë ka reaguar edhe vetë ministri i Punëve të Brendshme, Xhelal Sveçla.
Ai tha se tentimet për frikësime ndaj qytetarëve që po regjitrojnë automjetet e tyre në targa RKS po vazhdojnë edhe më tutje në pjesën veriore.
“Tentimet për frikësime po vazhdojnë. Sot një tjetër oficer i Policisë së Kosovës nga komuniteti serb është sulmuar nga strukturat ilegale të cilët i kanë djegur veturën me targa legale RKS. Kjo është një ftesë e hapur për të luftuar institucionet e Republikës së Kosovës”, ka thënë ai.
Ministri Sveçla e ka fajësuar direkt për këtë akt dhe situata tjera të ngjashme presidentin serb Aleksandër Vuçiq, i cili ditë më parë hapur foli për paraqitjen e njerëzve të uniformuar në veri të Kosovës.
“I kërkojmë Vuçiqit të ndalojë së mbështeturi aktet e dhunshme dhe terroriste ndaj qytetarëve besnikë të Republikës së Kosovës”, ka thënë Sveçla.
The fear-mongering tendencies continue. Today another Serbian KP officer was assaulted by illegal structures who burned his car with legal RKS plates.This is an open invitation to fight RKS inst. We ask Vucic to stop supporting violent & terrorist acts towards loyal RKS citizens.
— Xhelal Sveçla (@XSvecla) September 19, 2022
Ministri i Punëve të Brendshme, Xhelal Sveçla ditë më parë tha se institucionet e Republikës së Kosovës, por edhe ato të aleatëve, kanë konfirmuar se edhe në natën mes 31 korrikut dhe 1 gushtit kishte grupe të armatosura dhe të uniformuara me maska në pjesën e veriore të vendit.
Ai tutje shtoi se në vazhdimësi kanë theksuar se këto grupe po drejtohen nga strukturat qeveritare të Serbisë, madje vetë presidenti Aleksandër Vuçiq.
“Që të gjitha grupet që janë të organizuara në drejtim të luftimit të shtrirjes së sovranitetit dhe ruatjes së integritetit territorial të institucioneve të Republikës së Kosovës jo vetëm se janë të cytura, por janë edhe të financuara dhe të udhëhequra nga Aleksandër Vuçiq dhe Qeveria e Serbisë”, ka thënë ministri Sveçla, raporton KosovaNews.