Shkolla Fillore “Hasan Prishtina” ka marrë vendim që të ndalojë përdorimin e telefonave mobilë gjatë qëndrimit në shkollë, me qëllim që të sigurohet një mjedis më i sigurt dhe të shmanget shpërqendrimi.
Shkolla ka njoftuar të mërkurën se në raste urgjente, prindërit dhe nxënësit mund të kontaktojnë nëpërmjet zyrës së shkollës, e shkelja e këtij rregulli “do të sjellë masa disiplinore, përfshirë konfiskimin e përkohshëm të telefonit”.
“Ju njoftojmë se, duke filluar nga data 10..10.2024,është e ndaluar përdorimi i telefonave mobilë gjatë qëndrimit në shkollë. Kjo masë është marrë për të siguruar një mjedis më të sigurt në shkolle dhe për të shmangur shpërqendrimet e nxënësve gjatë orëve mësimore. Në raste urgjente, prindërit dhe nxënësit mund të kontaktojnë përmes zyrës së shkollës. Shkelja e këtij rregulli do të sjellë masa disiplinore, përfshirë konfiskimin e përkohshëm të telefonit”, thuhet në njoftimin e shkollës.
Me udhëzim administrativ, Ministria e Arsimit e ka ndaluar përdorimin e telefonave gjatë procesit mësimor.
Edhe me rregullore komunale ndalohet bartja e telefonave në institucionet arsimor.
