Ish-ministri i Kulturës, Rinisë dhe Sportit, Hajrulla Çeku, i emëruar ministër i Arsimit dhe Shkencës, ka uruar ministren e re të Kulturës dhe Turizmit, Saranda Bogujevci, si dhe ministrin e ri të Sportit dhe Rinisë, Blerim Gashani, për marrjen e detyrave të reja.
Përmes një reagimi publik, Çeku ka shprehur bindjen se përvoja, përkushtimi dhe vizioni i tyre do të jenë shtysë e re për zhvillimin e mëtejmë të sportit, kulturës dhe turizmit në vend.
“Jam i bindur se përvoja, përkushtimi dhe vizioni i tyre do të jenë shtysë e re për zhvillimin e mëtejmë të sportit, kulturës dhe turizmit në vendin tonë. Këto fusha janë themel i identitetit dhe energjisë sonë shoqërore dhe meritojnë angazhim të pandërprerë”, ka theksuar ai.
Çeku ka shfrytëzuar rastin për të falënderuar të gjitha komunitetet dhe bashkëpunëtorët me të cilët ka punuar gjatë mandatit të tij. Ai ka shprehur mirënjohje të veçantë për artistët, sportistët, punëtorët kulturorë, federatat, organizatat, profesionistët e trashëgimisë kulturore, të rinjtë, stafin e MKRS-së, institucionet e varësisë dhe kabinetin për punën dhe përkushtimin e treguar.
Në fund, ai u ka uruar suksese dy ministrave në përgjegjësitë e reja, duke theksuar rëndësinë e vazhdimësisë dhe angazhimit në këto sektorë kyç për vendin.
