Audio-incizimi i kryetarit të Komunës së Prizrenit, Shaqir Totaj, i publikuar javë më parë ekskluzivisht në KosovaNews, ka nxitur përplasje në mes të pozitës dhe opozitës në këtë Komunë.
Lexo po ashtu: Ekskluzive! Audioincizimi që dëshmon pazaret e Shaqir Totajt, emëron drejtor shkolle dhe auditor në këmbim të votave në asamble
E gjithë kjo, pasi asamblistja e Lëvizjes Vetëvendosje, Dafina Alishani, ka lëshuar audio-incizimin në Kuvend duke kërkuar nga Totaj që të sqarohet lidhur me rastin.
Menjëherë pas lëshimit të incizimit, ka ndërhyre kryesuesja e Kuvendit Antigona Bytyqi që vjen nga radhët e PDK-së.
Bytyqi, duke ia ndërprerë fjalën e Alishanit, ka kërkuar që ta ndalë audio-incizimin.
Ndërkohë Alishani i ka kërkuar Totajt dhe qeverisjes së tij që të ballafaqohet me qytetarët dhe të tregojë “trikat e tij të pazareve”
“Kryetar, qysh po i bën këto pazare, tregoi edhe qytetarëve. Çdo dy javë po të dalin incizimet. A mundesh me dalë me na tregu se çka janë këto incizime? A mundesh së paku me dalë me i kërku falje qytetarëve? Është turp se çka po ndodhë brenda një viti në qeverisjen e PDK-së. Turp është që po na i ndalni edhe mikrofonat. Qytetarët e kanë kryetar dhe qytetarët po donë me ndi se çka janë këto pazare e çka janë këto trika. Dilni ballafaqohuni me qytetarë, dilni tregoni se çfarë trika keni. Dilni tregoni se ju kështu dini me qeverisë. E nuk ju kemi faj. Krejt qytetarët po ju dëgjojnë.”, ka thënë Alishani në Kuvendin e Prizrenit.
I futur në siklet pas pyetjeve Alishanit, duke mos e mohuar audio audio-incizimin Totaj deklaroi se nuk i komenton audio-incizimet, ngase siç ka thënë ai të janë të paligjshme.
“Shikoni, incizimet janë të pa autorizume, ato janë vepra ilegale, nuk janë të lejume me ligj. Prandaj për veprime që bëhen jashtë ligjit, nuk meritojnë as të komentohen e aq më pak të jepen përgjigje.”, ka thënë Totaj.
Kujtojmë se gjatë muajit kaluar, KosovaNews, kishte publikuar ekskluzivisht audio-incizimin e Kryetarit të Prizrenit, Shaqir Totaj ku ai vet i tregon dallaveret – pazaret me postet publike duke pohuar se ka emëruar drejtor shkolle dhe auditor në këmbim të votave në asamble.
Lexo po ashtu: Ekskluzive: Policia nis hetimet pas audioincizimit për Shaqir Totajn, rasti kalon në Prokurorinë Speciale
E gjithë kjo që është raportuar dhe dëgjohet në audio-incizim mund të vërtetohet fare lehtë, ngase personat që përfshihen në audio-incizim, pas këtij kanë marrë pozitat e punës dhe vazhdojnë të jenë po në ato vende të punës që i kanë përfituar jashtëligjshëm.
Ndërkaq, vetëm disa ditë pas publikimit të këtij audio incizimi, janë aktivizuar autoritetet e ndjekës së Kosovës, dhe me rastin tanimë është marrë Prokuroria Speciale.