Ndërmarrja Publike “Trainkos” ka reaguar lidhur me debatet dhe raportimet e fundit për riparimin e vagonëve të saj në Zrenjanin të Serbisë, duke thënë se disa nga pretendimet e publikuara në media janë dezinformata.
Sipas Trainkos-it, riparimi i pesë vagonëve, i përfunduar në dhjetor të vitit 2024, është realizuar përmes një tenderi të hapur, me numër 10908-24-1153-2-1-1, të publikuar më 15 shkurt 2024.
Tenderi, sipas ndërmarrjes, është fituar nga kompania vendore Profitech Sh.P.K., me seli në Prishtinë, e cila ishte operatori i vetëm ekonomik që kishte aplikuar në këtë procedurë.
Trainkos thotë se kompania fituese ka pasur përgjegjësi për përzgjedhjen e nënkontraktorëve dhe se ndërmarrja nuk ka pasur bazë juridike për të përcaktuar apo ndikuar në zgjedhjen e tyre.
“Vetëm në Zrenjanin mund të riparohen”
Pas raportimeve të sotme, Trainkos thotë se ka kontaktuar zyrtarisht kompaninë Profitech për të marrë sqarime se pse vagonët janë dërguar në Zrenjanin, nëse është dashur leje për këtë dhe nëse ka pasur mundësi që riparimi të kryhej diku tjetër.
Sipas përgjigjes që Trainkos thotë se e ka marrë nga operatori ekonomik:
- vagonët janë dërguar në Zrenjanin pasi “vetëm ata mund t’i rregullojnë këta vagonë”;
- dogana është njoftuar paraprakisht dhe vagonët kanë kaluar përmes Maqedonisë së Veriut drejt Serbisë;
- nuk ka pasur mundësi që riparimi të kryhej në një vend tjetër, pasi, sipas kompanisë, vagonët nuk mund të riparoheshin diku tjetër.
Megjithatë, Trainkos njofton se do të realizojë një vlerësim të pavarur për të parë nëse punime të tilla mund të kryhen edhe nga operatorë në shtete të tjera.
Në rast se konstatohet se ekzistojnë mundësi të tjera, ndërmarrja thotë se do t’i shqyrtojë ato brenda kornizës ligjore.
Trainkos: Vagonët janë riparuar në Serbi edhe në vitin 2017
Ndërmarrja ka dhënë edhe një sqarim për historikun e vagonëve, duke thënë se ata janë blerë nga Gjermania në vitin 2017 dhe po atë vit janë riparuar në Zrenjanin.
Sipas Trainkos-it, në atë kohë komisioni i ndërmarrjes kishte vizituar punishten në Zrenjanin për të bërë pranimin teknik të vagonëve.
“Është tendencioze dhe manipuluese që konteksti dhe historiku i riparimit të vagonëve të injorohet për qëllim të politikave ditore të cilat aspak nuk i shërbejnë interesit publik”, thuhet në reagimin e ndërmarrjes.
Ky sqarim i Trainkos-it vjen në një kohë kur është rikthyer në qendër të debatit politik çështja e dërgimit të vagonëve të Kosovës për riparim në Serbi.
Trainkos mohon se ka larguar nga puna një punonjës
Në reagimin e saj, ndërmarrja ka mohuar kategorikisht edhe pretendimet se një punonjës i apostrofuar në raportimet mediale lidhur me këtë rast është larguar nga puna për shkak të çështjes së vagonëve.
Trainkos thotë se punonjësi nuk është përjashtuar nga puna, por aktualisht ndodhet në procedurë para komisionit disiplinor për shkak të, siç pretendon ndërmarrja, “shkeljeve të shumta të detyrave të punës”, përfshirë edhe mosvijimin në punë.
Sipas Trainkos-it, çdo përpjekje për ta lidhur procedurën disiplinore me çështjen e vagonëve është “fabrikim dhe manipulim”.
Në fund, ndërmarrja thotë se mbetet e përkushtuar për mbrojtjen e interesit publik dhe respektimin e ligjeve të Kosovës, ndërsa u ka bërë thirrje të gjitha palëve që informacionet t’i marrin nga komunikimet zyrtare dhe institucionale.
