Agjencia e Ushqimit dhe Veterinarisë ka ndaluar importin e shpezëve të gjalla dhe produkteve të tyre nga Polonia pasi është konfirmuar prania e sëmundjes Avian Influenza (HPAI–H5N1).
Bëhet e ditur se sëmundja është evidentuar në ferma komerciale, familjare dhe tek shpezët e egra në regjionet Lubuskie, Wielkopolskie, Kodzkie dhe Podlaskie.
AUV ka njoftuar se do ta monitorojë situatën në vazhdim dhe ka përjashtuar nga vendimi produkte që origjinë kanë fermat e paprekura nga sëmundja dhe që gjenden 50km larg zonave të prekura.
“Në funksion të mbrojtjes së shëndetit të kafshëve dhe sigurisë ushqimore në Republikën e Kosovës, AUV vendos ndalimin e menjëhershëm të importit të shpezëve të gjalla dhe produkteve të tyre nga zonat e prekura. Përveç nëse ato kanë origjinën nga ferma të paprekura nga sëmundja, të cilat gjenden në një rreze prej 50 km larg zonave të prekura”, thuhet në njoftimin e AUV-it.
Agjencia ka bërë me dije se kjo masë hyn në fuqi menjëherë dhe mbetet në zbatim deri në vlerësimin e mëtejshëm të situatës.
