Komuna e Prishtinës ka prezantuar programin e ri të mësimit gjithëditor në pesë shkolla, ndërsa qëllim i tij u tha se është përmirësimi i cilësisë së arsimit dhe avancimi i aftësive të fëmijëve përmes aktiviteteve jashtëkurrikulare
Gjatë prezantimit të këtij programi, kryetari i Prishtinës, Përparim Rama, ka deklaruar se kjo do të ketë ndikim edhe tek prindërit, pasi nuk do të kenë nevojë t’i marrin fëmijët në mesditë.
“Prindërit munden me u fokusu diku tjetër dhe jo të shkojnë t’i marrin në mes të ditës. Mësimi tërëditor i bënë më të përmbushur edhe prindërit dhe fëmijët”, ka thënë Rama.
Kurse, drejtoresha e Arsimit, Jehona Lushaku-Sadriu, ka deklaruar se qëllimi i këtij programi është ngritja e cilësisë dhe shndërrimi në model për komunat tjera.
“Qëllimi është ngritja e cilësisë së arsimit dhe të jetë edhe model në komunat tjera. Ka edhe shtete qe e praktikojnë mësimin tërëditor nga 1 deri 5. Kemi siguruar mjete dhe do t’ju mundësojmë që korrikula bazë të realizohet në mënyrë më kreative. Kemi marre sportist në mënyrë qe t’i realizojmë në mënyrë profesionale lëndën e sportit”, ka thënë ajo.
