Duke parë rëndësinë dhe kërkesat për avancim të cilësisë në arsim, Instituti Pedagogjik i Kosovës, në bashkëpunim me fondacionin MUTE dhe Institutin Ed Guard, kanë organizuar simpoziumin shkencor me temë “Integrimi i artit, dramës dhe teatrit në edukim”.
Qëllimi i këtij simpoziumi shkencor ishte shqyrtimi i rolit të artit, dramës dhe teatrit në përmirësimin e procesit mësimor dhe të ofrojë rekomandime për veprime konkrete, për hartuesit e plitikave arsimore dhe institucionet edukative arsimore.
Në këtë ngarje me rëndësi të madhe për arsimin kosovar, të pranishëm ishin mbi 80 pjesëmarrës, nga fusha e arsimit dhe e artit, profesionistë dhe ekspertë të ndryshëm, si dhe përfaqësues nga Drejtoritë Komunale të Arsimit, drejtorë të shkollave, mësimdhënës dhe njohës të arsimit dhe të artit.
Simpoziumi i bashkoi institucionet relevante të Republikës së Kosovës, personalitete të njohura nga fusha e artit dhe edukimit.
Hapjen e simpoziumit e bëri drejtori i Institutit Pedagogjik, Ismet Potera, ndërsa të pranishimt i përshendetën edhe drejtori i Institutit Ed Guard, drejtuesja e fondacionit MUTE, si dhe përfaqësuesi nga MASHTI, z. Avni Rexha.
Simpoziumi i filloi punimet me prezantimin e të gjeturave nga hulumtimi me temë “Roli edukativ i dramës-teatrit dhe zbatimi i tij në kuadër të procesit mësimor”, nga hulumtuesja e IPK-së, Zehrije Plakolli.
Me anë të kumtesave dhe pjesëmarrjes në panel, kontribuan: Fadil Hysaj – professor, laureat i disa çmimeve ndërkombëtare për punën në art dhe kulturë , Erenestina Gjergjaj – profesoreshë në Universitetin e Tiranës, Elizabeta Qarri – profesoreshë e muzikës në Universitetin e Muzikës, Ilire vinca – profesoreshë e shquar në skenën e artit dhe filmit në Universitetin e Prshtinës, Marjela Progni, Linda Hoxha, Mimoza Shahini dhe Luljeta Rama – Muçaj – profesoresha në Universitetin e Prishtinës, profesori Agim Selimi dhe mësimdhënësja Blerina Kallaba.
Kumtesat nxitën debat dhe diskutim me pjesëmarrësit e simpoziumit.
Nga ky simpozim dolën rekomandime të rëndësishme për format e zbatimit të qasjeve kreative të mësimdhënies, përmes artit, dramës dhe teatrit, për një proces mësimor më tërheqës dhe kreativ, si dhe rezultate më të mira. Përmbledhja e rekomandimeve do të publikohet në ueb-faqen e IPK-së.
Në fund u shpërndanë certifikata për pjesëmarrësit dhe prezantuesit.
