Drejtoria për Hetimin e Krimeve Ekonomike dhe Korrupsionit në bashkëpunim me inspektorët e Agjencisë së Ushqimit dhe Veterinarisë së Kosovës (AUVK) sot kanë zhvilluar një operacion të madh të kontrollit te prodhuesit e mishit në disa rajone të Kosovës.
Gjatë kontrollit në disa objekte të fabrikave të përpunimit të mishit në Mitrovicë, Pejë e Vushtrri janë gjetur mbi 2000 kilogram mish me afat të skaduar, i cili dyshohet se pas ripërpunimit po përgatitej të hidhej përsëri në treg.
KosovaNews nga burime të saj brenda institucioneve të vendit mëson se në mesin e kompanive- fabrikave ku është gjetur mishi pa afat është “Buquku” dhe “Apetit”.
Kontrolle janë kryer në objektet e fabrikës së përpunimit të mishit “Buquku” në Pejë, ku janë gjetur sasi e mishit pa afat, ndërsa sasi e madhe është gjetur edhe gjatë kontrolleve të bëra në objektet e fabrikës për përpunimin e mishit “Apetit” në Vushtrri.
Aktualisht për këtë rast, Policia e Kosovës është duke intervistuar disa persona nga kompanitë ku është gjetur sasia e mishit pa afat.
Pas përfundimit të këtij operacioni sasia e mishit është konfiskuar, një pjesë është shkatërruar, ndërsa pjesa tjetër është dërguar në laborator për analiza.
Ky operacion vjen pas helmimit të mbi 200 personave në komunën e Malishevës të cilët dyshohet se u helmuan pas konsumimit të ushqimit në një lokal në qytetin e Malishevës.
Kujtojmë se institucionet e vendit edhe vite më parë patën gjetur tonelata me mish në depon e fabrikës “Buquku”, e cila nuk i respektonte kushtet higjieno-sanitare.
Madje policia bëri arrestime në kompaninë “Buquku” nën dyshimin për veprën penale – prodhim dhe vënie në qarkullim të artikujve të dëmshëm ushqimor.
