Qeveria e Spanjës vazhdon të besojë se finalja e Kupës së Botës 2030 do të zhvillohet në këtë vend.
Duke folur pas raportimeve se FIFA ia ka premtuar Marokut finalen e Botërorit të ardhshëm, ministrja spanjolle e sportit, Milagros Tolon, ka thënë se “Spanja e meriton të organizojë ndeshjen për titull”.
“Jemi kampionë në fuqi të botës për meshkuj dhe femra, ndërsa Spanja dhe Portugalia kryesuan ofertën për Kupën e Botës 2030, të cilës Maroku iu bashkua më pas”, ka thënë Tolon.
“Kemi shumë përparësi dhe pika të forta si vend”.
Spanja, Portugalia dhe Maroku janë nikoqirët kryesorë të Kupës së Botës 2030. Maroku shpreson të organizojë finalen në stadiumin e planifikuar “King Hassan II”, në afërsi të Kasablankës, që pritet t’i ketë 115 mijë ulëse.
Spanja i ka dy stadiume kandidate – “Santiago Bernabeu” në Madrid dhe “Camp Nou” në Barcelonë.
FIFA ka mohuar se presidenti i saj, Gianni Infantino, ia ka ofruar finalen Marokut në shkëmbim të përkrahjes në momentin e vështirë që po kalon.
Tolon ka thënë se qeveria spanjolle është befasuar nga raportet se FIFA ia ka dhënë finalen Marokut.
“Gjëja më e rëndësishme është që FIFA tashmë e ka mohuar këtë”, ka theksuar ajo.
“Ne po punojmë me FIFA-n dhe e kemi takimin e radhës në shtator. Nga FIFA e kanë mohuar qartë këtë lajm. Ne do të vazhdojmë të punojmë pasi duam, dhe duhet që finalja e Botërorit të zhvillohet në Spanjë”.
