Profesori i shkencave politike në njërin nga universitetet e Parisit, Nezir Kraki ka reaguar pas ngritjes së diskutimeve që nxiti vendimi i Ministrisë së Industrisë, Ndërmarrësisë dhe Tregtisë, për pezullimin e certifikatës së biznesit për televizionin Klan Kosova.
Vetë Kraki thotë se shumë miq në Klan Kosova dhe mbetet i palëkundur në mbrojtje të lirisë së fjalës.
Megjithatë, ai thotë se i duket që çështja e Klan Kosovës nuk ka lidhje me zanatin e gazetarisë i cili duhet të ushtrohet pa asnjë lloj presioni.
“Me sa kemi pa deri sot, Klan Kosova nuk është në atë procedure për ndonjë lajm apo reportazh që nuk i ka pëlqy pushtetit, por për dyshimet apo paqartësitë financiare dhe administrative të cilat lidhen me Klanin si biznes, si firmë e si investim. I mbështes krejt ata që solidarizohen me koleget e tyre në Klan Kosova dhe i bashkohem asaj nisme, por duhet të jemi të sinqertë e objektivë (sidomos mediat) në ato që pretendojnë apo mbrojnë publikisht. Patetizmi nuk është gazetari”, ka shkruar në reagimin e tij Kraki.
Profesori nga Parisi në këtë rast shtron pyetjen se sa media janë interesuar të hulumtojnë objektivisht për ketë rast në mënyre që të dalin me fakte e prova për mbrojtjen e Klanit, pasi sipas tij, veç me logo nuk mbrohet.
“Sa media na informojnë për lidhjet e supozuara të Klanit me financime te dyshimta? Për thyerje të rregullave si biznes dhe si emetues… Sepse veç për këto tema bëhet fjalë, jo për liri të shprehjes as për të fjalës”.
Mes tjerash Kraki thekson se nuk duhet harruar, pasi që të gjithë e dimë që mediat në Kosovë e Shqipëri para se të jenë gazetari janë biznese dhe në disa raste biznese kriminale.
“Ky është realiteti pas kamerave. Me këtë realitet duhet të merret shteti sepse nën kamuflimin e gazetarisë nuk mund të lejohen organizata e montime financiare kriminale apo armiqësore ndaj interesave të vendit. Kështu që, kadalni se për pak mendova qe jeni tu e ushtru zanatin në Bjellorusi a n’Kore të Veriut”, ka shkruar mes tjerash profesor Kraki.
Ministrja e Industrisë, Ndërmarrësisë dhe Tregtisë, Rozeta Hajdari dje e ka komentuar vendimin për pezullimin e certifikatës për televizionin Klan Kosova.
Hajdari ka thënë se këtë rast e kanë proceduar në organet e hetimit dhe se ka ndodhur për shkak të dokumentacioneve me adresë të rreme.
“Detyra e çdo zyrtari publik është të mbrojë Republikën e Kosovës, duke filluar nga emri zyrtar i saj. Dhe duhet ta keni parasysh se për këtë nuk ka kompromis. Më vjen keq që ka ndodhur në biznes që ushtron veprimtari të informimit publik, pra kjo e bën edhe më të rëndë. Por, siç e dini ARBK trajton vetëm rastin e kompanisë si biznes, çështjet e medies si të tillë trajtohen nga Komisioni Pavarur i Medieve dhe as MINT as qeveria, nuk hap media e as nuk mbyll media.
Dhe për më shumë arsyen pse është pezulluar certifikata e biznesit është që të jemi të qartë edhe një herë se dokumentacioni me adresë të rreme, aq më keq me emërtim Gjakovë-Serbi dhe me emërtim Pejë-Serbi është veprim shumë i rëndë përpara ligjit, përpara Kushtetutës dhe aq më shumë mbi të gjitha është shumë e rëndë përpara vendit tonë, është shumë e papërgjegjshme kjo situatë”, ka potencuar ministrja Hajdari.
Ajo ka shtuar se këtë rast e kanë proceduar në organet e hetimit, sepse mashtrimi është i madh.
“Në këtë rast e kemi proceduar në organet e hetimit, sepse mashtrimi është tepër i madh. Unë ftoj të gjithë të interesuarit të respektojnë republikën tonë, emërtimet e republikës tonë dhe vazhdojmë tutje së bashku”, ka shtuar ajo.
Ky vendim ka zgjuar reagim të shumta nga mediat vendore, organizata vendore e ndërkombëtare si dhe të ambasadave të shumta në Kosovë si dhe së fundi edhe të Bashkimit Evropian (BE).
Përmes një postimi në rrjetin social në Twitter nga Bashkimi Evropian kanë thënë se janë të shqetësuar rreth pezullimit të licencës së biznesit të Klan Kosovës, si dhe janë duke i monitoruar nga afër zhvillimet e fundit.
