Ministria e Industrisë, Ndërmarrësisë dhe Tregtisë ditë më parë kishte marrë vendim për pezullimin e certifikatës së biznesit të Klan Kosovës.
Ky vendim ka zgjuar reagim të shumta nga mediat vendore, organizata vendore e ndërkombëtare si dhe të ambasadave të shumta në Kosovë si dhe së fundi edhe të Bashkimit Evropian (BE).
Përmes një postimi në rrjetin social në Twitter nga Bashkimi Evropian kanë thënë se janë të shqetësuar rreth pezullimit të licencës së biznesit të Klan Kosovës, si dhe janë duke i monitoruar nga afër zhvillimet e fundit.
“Të shqetësuar rreth pezullimit të licencës së biznesit të Klan Kosovës. BE-ja po e monitoron nga afër zhvillimet. Vëmendja u përqendrua veçanërisht në ndikimin e mundshëm në lirinë e medias”, kanë thënë nga BE.
Concerned about @klankosova_tv's business license suspension.??is monitoring the developments closely. Attention focused especially on the potential impact on the media freedom. The #EU remains committed in protecting&promoting the freedom of expression& information in ??#Kosovo.
— European Union in Kosovo (@EUKosovo) June 16, 2023
Po ashtu në reagim thuhet se BE-ja mbetet e përkushtuar në mbrojtjen dhe promovimin e lirisë së shprehjes dhe informimit në Kosovë.
Ministrja e Industrisë, Ndërmarrësisë dhe Tregtisë, Rozeta Hajdari dje e ka komentuar vendimin për pezullimin e certifikatës për televizionin Klan Kosova.
Hajdari ka thënë se këtë rast e kanë proceduar në organet e hetimit dhe se ka ndodhur për shkak të dokumentacioneve me adresë të rreme.
“Detyra e çdo zyrtari publik është të mbrojë Republikën e Kosovës, duke filluar nga emri zyrtar i saj. Dhe duhet ta keni parasysh se për këtë nuk ka kompromis. Më vjen keq që ka ndodhur në biznes që ushtron veprimtari të informimit publik, pra kjo e bën edhe më të rëndë. Por, siç e dini ARBK trajton vetëm rastin e kompanisë si biznes, çështjet e medies si të tillë trajtohen nga Komisioni Pavarur i Medieve dhe as MINT as qeveria, nuk hap media e as nuk mbyll media.
Dhe për më shumë arsyen pse është pezulluar certifikata e biznesit është që të jemi të qartë edhe një herë se dokumentacioni me adresë të rreme, aq më keq me emërtim Gjakovë-Serbi dhe me emërtim Pejë-Serbi është veprim shumë i rëndë përpara ligjit, përpara Kushtetutës dhe aq më shumë mbi të gjitha është shumë e rëndë përpara vendit tonë, është shumë e papërgjegjshme kjo situatë”, ka potencuar ministrja Hajdari.
Ajo ka shtuar se këtë rast e kanë proceduar në organet e hetimit, sepse mashtrimi është i madh.
“Në këtë rast e kemi proceduar në organet e hetimit, sepse mashtrimi është tepër i madh. Unë ftoj të gjithë të interesuarit të respektojnë republikën tonë, emërtimet e republikës tonë dhe vazhdojmë tutje së bashku”, ka shtuar ajo.
