Kanë filluar të mbledhen qytetarët në Prishtinë të cilët po protestojnë në kërkim të drejtësisë pas vrasjes mizore të Liridona Ademajt më 29 nëntor.
“Nuk ka paqe pa sigurinë e grave”, “Edhe sa thirrje të humbura” , “Liri, barazi, solidaritet” janë disa nga pankartat e brohoritjet e protestuesve.
Ata kanë protestuar duke thënë se “vrasjet e grave duhet të trajtohen me urgjencë kombëtare” dhe “poshtë patriarkati”.
Liridona Ademaj është vrarë më 29 nëntor në fshatin Bërnicë në Prishtinë.
Gjykata Themelore në Prishtinë ua ka caktuar tre të dyshuarve masën e paraburgimit prej 1 muaji.
Në mesin e të dyshuarve është edhe bashkëshorti i saj, Naim Murseli.
Ai është i dyshuar për organizim të vrasjes, Granit Plava është i dyshuar për kryerje të vrasjes dhe Kushtrim Kokalla, pjesëtar i Forcës së Sigurisë së Kosovës, është i dyshuar për shkak të veprës penale, marrëveshja për të kryer veprën penale, vrasje e rëndë.
Autoritetet e drejtësisë ende nuk e kanë bërë të ditur motivin e kësaj vrasjeje.
Vrasja e Liridonës ka marrë vëmendje të madhe, pasi fillimisht ajo ishte raportuar nga Policia e Kosovës si “grabitje me pasoja të vrasjes”.
Zemërim të madh ka shkaktuar edhe fakti që burri i saj ka qenë pjesë e ceremonisë së varimit.
Kryeministri i Kosovës ka thënë personat e përfshirë në vrasjen e Liridonës duhet ta marrin dënimin maksimal.
“Liridona Ademaj u vra me paramendim. U vra se ishte grua. Gratë dhe vajzat po vazhdojnë të vriten, gjersa normat shtypëse patriarkale ende janë të shpërndara gjerë… Për ta parandaluar këso krime makabër, duhet të punojmë secili e secila, në secilën fushë e vend. Këtë kulturë patriarkale e mizogjene, këtë maskulinitet të dhunshëm e toksik e zhdukim vetëm ashtu”, ka thënë Kurti përmes një postimi në Facebook.
Vrasjen e kanë dënuar edhe presidentja e Kosovës, Vjosa Osmani dhe ministrja e Drejtësisë Albulena Haxhiu.
Familja e Liridonës ka thënë se beson se autoritetet do ta vendosin drejtësinë në vend për këtë rast.
Ajo i ka lënë mbrapa dy fëmijë.
