Sonte nis edicioni i 34-të i festivalit që ndër vite ka promovuar muzikën popullore shqipe, “Zambaku i Prizrenit”. Sivjet interesimi është në nivel, teksa në Kino Bahçe do të dëgjohen tinguj muzikor të shoqëruar nga 14 artistë garues në ora 20:00.
“Këtë vit kemi pasur konkurrencë të jashtëzakonshme të këngëve që na kanë ardhur. Falë jurisë profesionale kemi arritur t’i zgjedhim 14 këngë të cilat sonte do të interpretohen para qytetarëve të Prizrenit”, ka thënë drejtori i shoqërisë kulturoro-artistike “Agimi”, Festim Bytyqi në një lidhje të drejtpërdrejtë për “Mirëmëngjesi Kosovë” në RTK.
Bytyqi për shikuesit e transmetuesit publik tregoi se sivjet garojnë artistë nga diaspora, Maqedonia e Veriut, Shqipëria e Kosova. Nuk mungon edhe prezenca e komuniteteve, ku sivjet ka edhe përfshirje të këngëtarëve turk.
“Ishim mbrëmë në provën gjenerale, unë jam shumë i kënaqur me performancat e artistëve të cilët kanë edhe këngë të mira, edhe orkestrime të mira. Janë përkujdesur njerëzit më eminentë të muzikës”, paralajmëron Bytyqi.
Për sa i përket historikut të rrugëtimit të “Zambakut të Prizrenit”, Bytyqi thotë se ende s’e ka marrë meritën e duhur organizative. Që nga periudha e organizimit nga autoritetet komunale, festivali nga viti në vit përballet me mungesë të stafit e telashe financiare.
“Nuk ka pasë një staf të mirëfilltë që me e avancu muzikën popullore sepse kushtet tani janë shumë më të favorshme si në aspektin teknik si materialisht, që ‘Zambaku’ të jetë një festival i përhershëm jo vetëm i Prizrenit por edhe i mbarë kombit”, u shpreh drejtuesi i SHKA “Agimi”.
Festivali “Zambaku i Prizrenit” ndan tre çmimet e para si dhe çmimin kryesor – atë të publikut – “Zambaku i Argjendtë”. Radio Televizioni i Kosovës është sponsori medial, i cili do të realizojë transmetimin e drejtpërdrejtë të edicionit të 34-të.
