Kryeministri Edi Rama deklaroi sot se ka ardhur koha që të ndërtojmë një NATO të arsimit.
Gjatë punimeve të Konferencës Ministeriale të Zonës Europiane të Arsimit të Lartë në Tiranë, Rama tha se “na duhet një organizatë si NATO, por për arsimin”.
“Ajo që shikojmë gjithmonë e më shumë është që urrejtja dhe mosrënia dakord për institucione demokratike po shtrihet gjithnjë e më shumë në të gjitha cepat e globit. Bazohet në një sistem që e ushqen këtë. Për një gjë nuk jam fort i sigurt, që sistemi ynë për t’i bërë rezistencë kësaj gjëje është i përgatitur. Në rast se në imagjinatën tonë ne do të mund të mendonim për konfrontime të brezave të rinj nga të dyja krahët, druaj se brezi ynë është më pak i përgatitur për t’i bërë ballë krahut tjetër, në rast se do të duhej të luftonin për vlerat demokratike që sfidohen nga forca të forta”, tha Rama.
Kryeministri theksoi se “ne duhet të vendosim një herë e mirë se si do ta trajtojmë të shkuarën, por edhe të ardhmen”.
“Shqetësuese është që e ardhmja jonë po përkufizohet nga e shkuara dhe gjithnjë e më shumë e shkuara po përdoret si pikë reference, pikë frymëzimi, shtysë për të imagjinuar të ardhmen. Unë besoj se duhet të jetë e kundërta. E kundërta do të shpëtojë botën tonë demokratike. E ardhmja duhet të kontrolloj të shkuarën. E ardhmja duhet të vendosë se cila është e shkuara për të gjithë ne, sepse e ardhmja është e vetmja hapësirë ku ne mund të gjejmë gjithmonë e më shumë arsye për t’u bërë bashkë. E shkuara është një hapësirë për të gjetur arsye për të pasur ndasi e luftuar me njëri-tjetrin”, tha Rama/ atsh
