Shqipëria pritet të hyjë në fazën më të rëndësishme të negociatave të anëtarësimit në Bashkimin Evropian, pasi sot formalisht nis mbylljen e kapitujve të negociatave.
Shqipëria bën pjesë në grupin e vendeve lidere në procesin e zgjerimit, duke u renditur menjëherë pas Malit të Zi, i cili sot shënon mbylljen e më shumë se gjysmës së kapitujve të negociatave. Ndërkohë, Ukraina dhe Moldavia nisin hapjen e grupkapitujve në procesin e anëtarësimit.
Në Bruksel kjo ditë po cilësohet si “Super e Marta”, pasi mbahet numri më i madh i konferencave ndërqeveritare të anëtarësimit në një ditë të vetme që nga viti 2002.
“Kemi numrin më të madh të konferencave ndërqeveritare për anëtarësim që nga viti 2002. Ky është një moment me rëndësi të jashtëzakonshme në procesin e zgjerimit. Këtë mëngjes zhvillojmë konferencën e anëtarësimit me Ukrainën. Më vonë, do të mbajmë konferenca të tilla edhe me Moldavinë, Malin e Zi dhe Shqipërinë. Gjatë vitit të kaluar, madje edhe më herët, kam vizituar kryeqytetet e të gjitha këtyre vendeve, ndërsa ministrat e tyre kanë vizituar gjithashtu Dublinin. Kemi pasur angazhime shumë të rëndësishme lidhur me zgjerimin dhe e shohim ditën e sotme si një moment vërtet shumë të rëndësishëm në këtë proces”, tha Thomas Byrne, ministër për çështje evropiane i Irlandës, vend që kryeson presidencën e BE-së.
Delegacionin shqiptar do ta udhëheqë kryeministri Edi Rama. Në konferencën ndërqeveritare do të mbyllen tre kapitujt e parë të negociatave.
“Ky është një moment historik për Shqipërinë, me fillimin e mbylljes së kapitujve të negociatave. Ndërkohë, Mali i Zi, që mbetet vendi kryesues në procesin e anëtarësimit, sot mbyll edhe dy kapituj të tjerë, duke e çuar në 18 numrin e kapitujve të mbyllur nga gjithsej 33, pra më shumë se gjysmën. Prandaj, kjo është një ditë për t’u festuar, por edhe një ditë për të parë përpara dhe për të punuar edhe më fort. Vendet anëtare e mbështesin këtë proces, por vetëm nëse vendet kandidate vazhdojnë të përmbushin detyrimet e tyre”, tha Marta Kos, Komisionere për Zgjerim:
Tirana dhe Brukseli kanë gjithsej 33 kapituj për të mbyllur para përfundimit të procesit të anëtarësimit. Shqipëria synon t’i përmbyllë negociatat deri në fund të vitit 2027, por realizimi i këtij objektivi do të varet nga përparimi në zbatimin e reformave.
