Kryetari i Prishtinës, Përparim Rama ka njoftuar se nga e hëna 300 kontejnerë të rinj do të vendosen në kryeqytet.
Rama thotë se angazhimi i ndërmarrjeve publike do të sjellin efektin e vet praktik e të prekshëm.
“Angazhimi serioz e përkushtimi profesional i punëtorëve plot vullnet e të palodhshëm të ndërmarrjeve tona publike, dhe potenciali i madh që kanë Ndërmarrjet tona të kryeqytetit siç është Ndërmarrja Publike Banesore sjellin efektin e vet praktik e të prekshëm”, thotë ai.
Tutje, Rama ka shkruar se “Ata, të prirë nga dedikimi e dashuria për qytetin kanë arritur të bëjnë një punë të vlefshme për të gjithë, kanë filluar vet me prodhimin e kontejnerëve, të cilët do të reduktojnë mbeturinat në kryeqytet dhe lehtësojnë punën e kushtet e punëtorëve të pastrimit”.
Ndryshe, Rama para pak ditësh kishte shkarkuar drejtorin e Shërbimeve Publike, pikërisht për shkak të problemeve me mbeturina në kryeqytet.
