Tensionet mes Izraelit dhe Iranit po rriten dita-ditës, me përshkallëzimin e deklaratave dhe veprimeve nga të dyja palët.
Ambasadorja e Izraelit në Kosovë, Tamar Ziv, ka folur për zhvillimet e fundit në Lindjen e Mesme, duke sqaruar se ambasadat izraelite nëpër botë nuk janë mbyllur, por kanë kaluar në një regjim të veçantë pune.
“Ambasadat e Izraelit nuk janë mbyllur, por kanë ndryshuar shërbimet që ofrojnë. Që nga fillimi i operacionit në Iran, nuk po ofrohen shërbime konsullore për publikun dhe po funksionojnë sipas udhëzimeve të emergjencës. Në Kosovë nuk kemi ambasadë; shërbimet janë ofruar përmes Ambasadës në Tiranë, e cila aktualisht nuk po i ofron këto shërbime”, deklaroi ajo.
Ambasadorja Ziv ka theksuar se regjimi iranian, sipas saj, është përkushtuar prej vitesh në armatim dhe retorikë kundër Izraelit. Ajo ka ngritur shqetësime për programin bërthamor të Iranit.
“Gjatë viteve, Irani ka investuar në ndërtimin e kapaciteteve ushtarake për të realizuar qëllimin e tij për shkatërrimin e Izraelit. Ai ka zhvilluar një program të fshehtë për armë bërthamore dhe një industri të raketave balistike me rreze deri në 4,000 kilometra. Raporti i fundit i Agjencisë Ndërkombëtare për Energji Bërthamore thekson se programi nuk është për qëllime paqësore. Vetëm në dy muajt e fundit, Irani ka pasuruar uranium mjaftueshëm për tri bomba bërthamore dhe në total ka sasi për nëntë të tilla.”
Sipas saj, situata është e tillë që kërkon reagim të menjëhershëm për të shmangur kërcënimin e një arme bërthamore.
Ndërkohë, tensionet janë reflektuar edhe në arenën ndërkombëtare. Sipas raportimeve në mediat botërore, Shtetet e Bashkuara po shqyrtojnë mundësinë për t’iu bashkuar ofensivës izraelite kundër Iranit.
Presidenti amerikan Donald Trump ka kërkuar dorëzimin e Iranit pa kushte, ndërsa udhëheqësi suprem i Iranit ka paralajmëruar pasoja të rënda në rast të një ndërhyrjeje amerikane.
