Në shenjë pakënaqësie për mosdhënien e lejeve për furnizim me dru zjarri, banorët e fshatrave Gjocaj dhe Jasiq për disa orë kanë bllokuar rrugën kryesore Junik – Gjeravicë.
Banorët kanë fajësuar zyrtarët e Parkut Nacional për vonesën që po iu bëhet, për t’u furnizuar me lëndë djegëse. Ata thonë se nuk po iu lejohet të marrin dru as nëpër bahçet e tyre.
“Nuk po na lejojnë me shku me i marrë në pronën tonë, jemi mbetur pa dru dy fshatra Gjocaj e Jasiq, besa edhe Juniku, prandaj nuk është vetëm çështja e ime, por e të gjithëve. As mollat në bahçe nuk guxojmë me i prekë”, deklaroi Sahit Jasiqi, banor nga fshati Jasiq.
Edhe Zenel Maloku nga fshati Gjocaj ka të njëjtin problem.
“E kemi bërë pagesën me letra për prerjen e druve një muaj më parë. Paret i kanë marrë e po thonë se nuk banë me pre dru. Na kemi nevojë për ngrohje, kemi fëmijë të vegjël, nuk i kemi kushtet për ngrohje qendrore, na duhen drutë, prandaj na kemi dalë me protestuar sot dhe ju bëjë thirrje institucioneve që të marrin masa sa më shpejtë”, deklaroi Maloku.
E në anën tjetër zyrtarët e Drejtorisë për Administrimin e Parkut Nacional “Bjeshkët e Nemuna” thonë se po e presin vendimin e Ministrisë së Mjedisit për të vepruar në terren.
“Sot banorët e fshatrave Gjocaj e Jasiq kanë protestuar për shkak të mos lejimit të prerjeve të druve. Ne aktualisht kemi rreth 60 kërkesa për prerje vetëm në këto dy fshatra e të cilët kanë aplikuar gjatë muajve prill – maj, mirëpo ne jemi duke pritur në çdo moment me ardhë një vendim nga ministria në mënyrë që banorëve t’iu mundësohet furnizimi me dru. Përndryshe jemi të gatshëm në çdo moment që pas këtij vendimi të dalim në terren për t’u lehtësuar banorëve prerjen dhe furnizonin me dru”, deklaroi Halil Jasiqi, zyrtar i DPN në Pejë.
Sipas zyrtarëve të Drejtorisë së Parkut Nacional, situatë e njëjtë për sa i përket dhënies së lejeve për furnizim me dru zjarri është edhe në komunat tjera brenda parkut nacional. Ndryshe, në marrëveshje me Policinë e Kosovës, e cila doli në vendin e ngjarjes, banorët protestues kanë liruar rrugën me shpresë se edhe ky hall i tyre do të zgjidhet së shpejt.
