Ministrja në detyrë e Drejtësisë, Donika Gërvalla, ka kujtuar viktimat e gjenocidit të Srebrenicës, në 31-vjetorin e masakrës ku u vranë 8.372 burra dhe djem boshnjakë.
Gërvalla tha se gjenocidi i Srebrenicës është një nga krimet më të rënda të kryera në Evropë pas Luftës së Dytë Botërore, i kryer nga forcat serbe të Radovan Karaxhiqit dhe Ratko Mlladiqit, dhe i dënuar nga drejtësia ndërkombëtare.
“Sot kujtojmë 8.372 burra dhe djem boshnjakë të vrarë mizorisht në gjenocidin e Srebrenicës, një nga krimet më të rënda të kryera në Evropë pas Luftës së Dytë Botërore”, ka shkruar Gërvalla.
Ajo ka thënë se në Srebrenicë nuk u vranë vetëm mijëra njerëz, por u sulmua edhe e drejta e një populli për të ekzistuar i lirë, i barabartë dhe i sigurt.
“Srebrenica na kujton se gjenocidi nuk fillon me armët e vrasjet, por me urrejtjen, propagandën, mohimin e tjetrit dhe politikat që synojnë zhdukjen e një populli”, është shprehur Gërvalla.
Sipas saj, mohimi i gjenocidit përbën vazhdim të padrejtësisë ndaj viktimave dhe kërcënim për paqen.
“Ne në Kosovë e dimë mirë çfarë do të thotë të të ndjekin, të të vrasin, të të masakrojnë, të të dhunojnë e të të zhdukin, vetëm pse je kush je. Prandaj solidariteti ynë me popullin boshnjak nuk është vetëm akt kujtese, por qëndrim i palëkundur në mbrojtje të së vërtetës, drejtësisë dhe dinjitetit njerëzor”, ka shkruar ajo.
Gërvalla ka bërë thirrje që viktimat e Srebrenicës të mos harrohen dhe që gjenocidi të mos mohohet e të mos përsëritet.`
