Qeveria e Kosovës në mbledhjen e sotme ka miratuar propozim-vendimin për t’i propozuar Kuvendit të Kosovës emërimin e anëtarëve të Komisionit për Dhënien e Provimit të Jurisprudencës.
Ministrja e Drejtësisë Albulena Haxhiu tregoi përbërjen e komisionit të propozuar, duke theksuar se është interesim i madh i kandidatëve për të ju nënshtruar këtij provimi.
“Marrë parasysh përfundimin e mandatit të komisionit paraprak për dhënien e provimit të jurisprudencës dhe gjithashtu interesimin e madh të kandidatëve për të ju nënshtruar këtij provimi, në përputhje me kompetencat tona, pra me nenin 5 të ligjit për provimin e jurisprudencës propozoj për votim përbërjen e komisionit të ri: Fejzullah Rexhepi që njëherit është edhe kryetar i Gjykatës Supreme, kryetar i komisionit, dhe Faton Bajrami zëvendës kryetar i komisionit, pyetës për lëndën e Drejta civile, edhe materiale po ashtu edhe procedurale, Sebahate Hoxha anëtare, dhe zëvendës anëtar Ersan Çavolli, pyetës për lëndën e Drejta penale, materiale dhe procedurale, Nora Bllaca-Dula, anëtare dhe zëvendës anëtare Afërdita Mullhaxha, pyetës për lëndën e Drejta kushtetuese dhe Bazat e sistemit gjyqësor. Franciska Imeri-Zhitia, anëtare dhe zëvendës anëtare Saranda Bogaj-Sheremeti, pyetës për lëndën e Drejta tregtare, e Drejta e punës dhe e Drejta administrative, Rrustem Thaçi, anëtar dhe zëvendës anëtar Jevorka Perlinqevç, pyetës për lëndën e Drejta ndërkombëtare private dhe publike dhe e Drejta e Bashkimit Evropian”, u shpreh Haxhiu.
Ajo nënvizoi se kusht ligjor është përvoja tetë vjeçare në sistemin e drejtësisë, kushtimisht përvojë profesionale që përfshin punën si prokuror, gjyqtar apo avokat.
Tutje Haxhiu tha se Komisioni për Dhënien e Provimit të Jurisprudencës do të jetë kompetent për vlerësimin e njohurive të kandidatëve për dispozitat ligjore dhe praktikën në fushën e drejtësisë, njohurive për institucionet juridike, shkathtësitë e të argumentuarit apo shkruarit juridik si dhe të gjykuarit sipas ligjit.
“Duke pasur parasysh kërkesën ligjore për barazi gjinore më lejoni të ju njoftoj që tani në këtë komision prej dhjetë anëtarësh kemi gjashtë gra dhe katër burra, dhe në anën tjetër përmbushet edhe kriteri ligjor për përfshirje të komuniteteve në këtë komision. Pas shqyrtimit ose gjatë kohës sa kemi qenë duke i trajtuar këto kandidatura jemi kujdesur që kandidatët t’i plotësojnë kushtet ligjore sepse siç e dini ligji parasheh që të kenë tetë vite përvojë pune në sistemin e drejtësisë, gjegjësisht përvojë profesionale, mirëpo përvoja profesionale nënkupton përvojën e punës në sistemin e drejtësisë, prokuror, gjyqtar por dhe avokat”, tha ndër të tjera ajo
