Në adresimin e saj vjetor në Kuvendin e Kosovës, Presidentja Vjosa Osmani theksoi rëndësinë e shqiptarëve si popull konstituiv në Maqedoninë e Veriut dhe rolin e tyre kyç në proceset e demokratizimit dhe integrimit euro-atlantik të këtij shteti.
Osmani shprehu shqetësime lidhur me përpjekjet që mund të minojnë të drejtat e shqiptarëve në këtë vend, duke paralajmëruar se çdo tentativë për të shkelur këto të drejta do të ndeshet me një kundërshtim të fortë dhe me një unitet të palëkundur nga shqiptarët në Ballkanin Perëndimor.
Presidentja theksoi se, pavarësisht shqetësimeve të shumta të shfaqura nga shqiptarët në Maqedoninë e Veriut për të drejtat e fituara me Marrëveshjen e Ohrit, Kosova dhe Shqipëria do të angazhohen maksimalisht për të siguruar që nuk do të bëhet asnjë hap prapa.
“Shqiptarët janë të integruar në thelb në proceset e demokratizimit dhe të integrimit euro-atlantik të Maqedonisë së Veriut,” theksoi ajo, duke shtuar se çdo përpjekje për të minuar këto të drejta do të përballet me reagim të vendosur nga shqiptarët kudo që ata jetojnë.
Tutje Osmani theksoi rëndësinë e koordinimit të vazhdueshëm ndërmjet Kosovës dhe Shqipërisë, duke theksuar se ky koordinim është i domosdoshëm jo vetëm për çështje të politikës së jashtme dhe sigurisë, por mbi të gjitha për të mbrojtur të drejtat e shqiptarëve në rajon dhe për të siguruar që ata të ecin përpara drejt integrimit të plotë në familjen euro-atlantike.
“Koordinimi i vazhdueshëm ndërmjet Kosovës dhe Shqipërisë, në veçanti për çështje të politikës së jashtme e sigurisë por mbi të gjitha për të mbrojtur të drejtat e shqiptarëve në të gjithë rajonin e kudo tjetër që jetojnë ata, është vendimtar për suksesin tonë dhe për ecjen përpara drejt familjes euro-atlantike, aty ku e kemi vendin dhe e meritojmë”, tha Osmani.
