Kryetari i LDK-së, Lumir Abdixhiku, për shkarkimin e së cilit u mblodh Kuvendi i Jashtëzakonshëm, tha se për herë të parë në historinë e këtij subjekti politik, delegatët u mblodhën jo për të zgjedhur por për të rrëzuar.
“I kemi quajtur e trajtuar si festë të gjitha proceset tona demokratike. Por sot më duhet të them me keqardhje të madhe se as nuk e ndjej as nuk e shoh si festë këtë kuvend. Do të mbeteni të sigurtë se as anëtarësia jonë, e lënduar, nuk e sheh e nuk e ndjen si të tillë. Për herë të parë në historinë tonë 37 vjeçare, nuk po mblidhemi për të zgjedhur por për të rrëzuar. Për këtë është mbledhur LDK sot. Pavarësisht rezultatit përfundimtar që kjo ditë do ta nxjerr, në historinë e LDK-së dita 30 korrik do të mbetet si dita kur rrëzimi i kryetarit të partisë ishte motiv i mbledhjes sonë”, tha ai.
“S’është ditë e lehtë për mua. Jo për shkak të karriges, por sepse është e rëndë të qëndrosh para njerëzve me të cilët ke ecur gjatë dhe se sot nuk na ka mbledhur ajo që duam ta ndërtojmë bashkërisht, por kërkesa që ta rrëzojmë njërin prej nesh”, ka thënë ai.
Abdixhiku e quajti LDK-në familje të tij politike dhe tha se në asnjë vendim, veprim apo sjellje, nuk e ka marrë duke menduar se është para këtij subjekti politik.
“Përpara se të jemi kundërshtarë në këtë çështje, kemi qenë dhe jemi bashkëpunëtorë. Para se të ndahemi rreth një emri, kemi qëndruar bashkë rreth një ideje. Dhe pasi kjo ditë të kalojë, ajo ide duhet të mbetet, është Lidhja Demokratike e Kosovës”, tha ai.
