Kryetari i Komunës së Lipjanit dhe ish-sekretari i Lidhjes Demokratike të Kosovës (LDK), Imri Ahmeti, ka deklaruar se shkarkimi i Lumir Abdixhikut nga posti i kryetarit të partisë është në të mirë të së ardhmes së LDK-së dhe vendit.
Ahmeti ka thënë se vazhdon t’i qëndrojë deklaratës së tij për shkarkimin e Abdixhikut, teksa ka theksuar se ai kishte kërkuar reflektim pas rezultateve të zgjedhjeve.
Ai ka përmendur se në janar kishte dhënë dorëheqje nga pozita e sekretarit të partisë, si dhe nga posti i kryetarit të Degës së LDK-së në Lipjan.
“Unë kam reflektuar. Qysh në Kuvendin e janarit kam kërkuar dorëheqjen nga posti i sekretarit të partisë dhe kam ofruar edhe dorëheqjen në Kuvendin Komunal si kryetar dege. Të shohim sot Kuvendin nëse do ta fuqizojë idenë tonë për të reflektuar lidhur me rezultatet e zgjedhjeve”, tha Ahmeti.
Kuvendi i jashtëzakonshëm i LDK-së është mbledhur sot me një pikë të vetme të rendit të ditës – shkarkimin e kryetarit Lumir Abdixhiku.
