Presidentja e Republikës së Kosovës, Vjosa Osmani, realizoi sot një vizitë zyrtare në Komunën e Shtimes, ku u prit nga Kryetari i Komunës, Qemajl Aliu.
Gjatë vizitës, Presidentja Osmani dhe Kryetari Aliu vizituan disa prej projekteve dhe pikave kryesore të qytetit, përfshirë punimet në Stadiumin e Qytetit, një projekt me vlerë 2.5 milionë euro, të financuar nga MKRS, që synon përmirësimin e infrastrukturës sportive në komunë.
Delegacioni më pas vizitoi Bibliotekën e Qytetit, ku u takua me të rinjtë e angazhuar në fushën e robotikës, si dhe ndërmarrjen lokale të suksesshme “Agrocoop”, si shembull i zhvillimit ekonomik vendor.
Kryetari Aliu falënderoi Presidenten Osmani për përkrahjen ndaj të rinjve, sportit, inovacionit dhe ndërmarrësisë lokale, duke e cilësuar këtë vizitë si një nxitje të madhe për vazhdimin me përkushtim të punës në dobi të qytetarëve të Shtimes.
