Policët e kidnapuar kanë arritur në Kosovë pas lirimit nga Serbia.
Ata janë liruar sot pas një vendimi të Gjykatës së Kralevës për mbrojtje në liri.
Tre policët kosovarë kanë mbërritur në Kosovë përmes pikës kufitare në Merdar, ku janë pritur nga kolegët e tyre.
Ata janë kidnapuar më 14 qershor nga forcat serbe brenda territorit të Kosovës, teksa janë mbajtur në paraburgim nga ajo ditë.
Presidentja e republikës së Kosovës Vjosa Osmani ka reaguar edhe një herë për lirimin e 3 policëve që ishin kidnapuar para 12 ditësh nga forcat specilae serbe në territorin e Kosovës. Nëpërmjet një postimi në Twiter presidentja Osmani ka thënë se me gjithë lirimin e policëve kjo nuk e liron Serbinë nga përgjegjësia për këtë akt flagrant agresioni ndaj Kosovës dhe shkelje të Marrëveshjes Teknike Ushtarake me NATO-n.
Presidentja Osmani për lirimin e policëve ka falënderuar patnerët përendimorë dhe në veçanti Shtete e Bashkuara të Amerikës
Kurse ministri i Punëve të Brendshme të Kosovës, Xhelal Sveçla pas lirimit të policëve ka thënë se Serbia vazhdon me lojërat e saj.
Ai në një postim në Facebook ka shkruar se policët sot kthehen në Republikën e Kosovës, në familjet e tyre e në radhët e Policisë së Kosovës.
Ka shtuar se ata do të bashkohen me kolegët e tyre në misionin e përbashkët për rend e ligj, siguri e sovranitet në tërë territorin e Republikës së Kosovës.
“Ndonëse lirimi i tyre sot është lajm i mirë, përndjekja e tyre nga Serbia do të vazhdojë në liri. Konfirmimi i aktakuzës dhe lirimi në procedurë të rregullt është vazhdim i orvatjeve të Serbisë për të mbuluar agresionin policoro-ushtarak brenda territorit të Republikës së Kosovës”, ka shkruar ai.
Edhe Ministria e Punëve të Jashtme dhe Diasporës, ka reaguar pas lirimit të tre policëve të kidnapuar nga Serbia, ndërsa është thënë seakuzat e autoriteteve serbe ndaj policëve janë të motivuara politikisht.
