Drejtori i Zyrës për Kosovë në Qeverinë e Serbisë, Petar Petkoviq, ka thënë se Asociacioni i komunave me shumicë serbe nuk do të jetë organizatë joqeveritare, por do të formohet sipas marrëveshjes së nënshkruar në Bruksel.
Në një deklaratë për media të martën, Petkoviqi i është përgjigjur zëvendëskryeministrit të Kosovës, Besnik Bislimi, që në Parlamentin Evropian u shpreh se Asociacioni duhet të jetë në përputhje me ligjet e Kosovës, qëndrimin e BE-së e se s’duhet të jetë nivel i tretë qeverisës.
“Përfaqësues të institucioneve të përkohshme në Prishtinë kanë intensifikuar fushatën e tyre propaganduese me të cilën synojnë ta rikonceptojnë Asociacionin e komunave serbe, duke u përpjekur me këmbëngulje ta reduktojnë në nivelin e një organizate joqeveritare, edhe pse është e qartë se Beogradi, në përpjekjet për të krijuar mekanizma solidë dhe të besueshëm për të mbrojtur pozicionin e vet dhe të drejtat e popullit serb në Kosovë, nuk do të devijojë as edhe një pikë nga Marrëveshja e parë e Brukselit dhe aktet e tjera nga dialogu që përcaktojnë qartë Asociacionin e komunave serbe”, ka thënë Petkoviqi në një komunikatë për media.
Sipas tij, Asociacioni i komunave me shumicë serbe nuk do të jetë organizatë joqeveritare.
“Sepse, po të ishte i tillë, Prishtina s’do të zvarriste për kaq vjet përmbushjen e obligimeve që dalin nga Marrëveshja e parë e Brukselit. Asociacioni s’do të jetë siç Besnik Bislimi ose Albin Kurti do të donin, por do të formohet sipas asaj që është nënshkruar në Bruksel”, ka deklaruar Petkoviq, raporton “Kosovo-Online”.
Më herët gjatë ditës, zëvendëskryeministri i Kosovës, Besnik Bislimi, para eurodeputetëve u shpreh se në kuadër të propozimit evropian për çështjen e Asociacionit janë tri kushte kryesore.
“Asociacioni duhet të jetë në përputhje me ligjet e Kosovës, duhet të jetë në përputhje me qëndrimet e BE-së se nuk mund të ketë fuqi ekzekutive, siç është thënë në letrën që ish-Përfaqësuesja e Lartë, Federika Mogherini, ia kishte dërguar atëbotë kryeministrit të Kosovës. Së treti, që Asociacioni të mos paraqesë nivelin e tretë të pushtetit”, ka thënë Bislimi.
Kryeministri Albin Kurti dhe presidenti i Serbisë, Aleksandar Vuçiq, një natë më parë në Bruksel u deklaruan se janë pajtuar për përmbajtjen e propozimit evropian, ndërsa nuk ka pasur nënshkrime. Kurti ka thënë se ishte i gatshëm ta nënshkruante planin, por s’e ka bërë këtë pasi është refuzuar nga Vuçiqi.
