Pasditën e sotme në lagjen “Lakrishte” në Prishtinë është goditur me thikë një person.
E për këtë rast disa pjesëtarë të Policisë së Kosovës i janë vënë pas personit që dyshohet se ka kryer këtë vepër.
Gjithë këtë aksion të policëve e ka përcjell gazetari i KosovaNews hap pas hapi.
Pas një ndjeke që kanë bërë policët kanë arritur që të kapin të dyshuarin dhe e kanë prangosur atë në lagjen “Santea” në Prishtinë.
Personi i arrestuar është dërguar në stacion dhe ndaj tij do të merren masat e përcaktuara me ligj për raste të tilla.
Ndërkohë Policia në një njoftim të saj bëri të ditur se në lidhje me rastin janë arrestuar tre persona të dyshuar.
“Sot rreth orës 13:30, kemi marrë informatën për një lëndim trupor të ndodhur në lagjen Lakrishtë, në Prishtinë. Bazuar në të dhënat fillestare, në këtë rast nga një mjet i mprehtë është lënduar një person”, ka thënë, Flora Ahmeti, zyrtare për informim në Policinë Rajonale të Prishtinës.
Ndërkaq si pasojë e plagëve që ka marrë viktima është dërguar për trajtim në Qendrën Klinike dhe Universitare të Kosovës (QKUK).
KosovaNews pas qaste pas rastit ka kontaktuar me mjekun e Emergjencës në QKUK, Avdush Bajgora, i cili ka pohuar se personi i therur me thikë është shtrirë klinikë dhe aktualisht po i jepet ndihma e parë.
Doktori nuk ka mundur të jep detaje tjera për personin, pasi duhet të bëhet një kontroll e analizë e mirëfilltë për të parë gjendjen e tij./KosovaNews/
