Ministri në detyrë i Administrimit të Pushtetit Lokal dhe deputeti Elbert Krasniqi, në emër të Grupit Multietnik në Kuvendin e Kosovës, ka bërë të ditur se i janë drejtuar Gjykatës Kushtetuese për të mos marrë për bazë ankesën e Listës Serbe, transmeton KosovaNews.
“Kemi kërkuar nga Gjykata Kushtetuese që të mos marrë për bazë ankesën e Listës Serbe, sepse kjo do të prishte balancin e respektimit të të drejtave të të gjithë komuniteteve jo shumicë dhe përfaqësimin në institucionet e vendit.
Ai ka thënë se asnjë komunitet nuk mund t’i shfrytëzojë ulëset e garantuara për të sjellë bllokadë
“Ne vlerësojmë që Kuvendi duhet të vazhdojë punën dhe asnjë komunitet nuk mund t’i shfrytëzojë ulëset e garantuara për të sjellë bllokadë, aq më tepër Lista Serbe. Kjo do të prishte balancin e të gjithë komuniteteve joshumicë dhe përfaqësimin e institucioneve”, tha Krasniqi.
Krasniqi po ashtu kujtoi se propozimi për Emilja Rexhepin ishte votuar në Kuvend dhe se edhe Lista Serbe kishte marrë pjesë në atë votim duke abstenuar.
“E drejta për të pasur nënkryetar na takon dhe kemi bërë propozim. Sot jemi në një situatë të bllokuar pasi që nuk është votuar nënkryetari i komunitetit serb Nenad Rashiq. Po të ishte zgjedhur, institucionet do të ishin në themelim e sipër. Kuvendi ka një mundësi shumë të mirë për ta zgjedhur Rashiqin dhe për të ecur përpara”, u shpreh ai.
Krasniqi krahasoi këtë situatë me praktikën e Bosnje – Hercegovinës, ku sipas tij, e drejta e pakicave është tentuar të kthehet në instrument bllokade.
“Përvoja atje është dëshmi e duhur se çfarë pasojash të rënda sjell një sistem ku pakica parlamentare mban në dorë të drejtën e vetos dhe bllokon funksionimin e shtetit. Jurisprudenca kushtetuese ka theksuar se asnjë komunitet nuk ka shumicë kushtetuese mbi tjetrin, por ka barazi. Në rastin tonë, ulëset e rezervuara garantojnë përfaqësim e jo dominim”, tha Krasniqi.
Ai foli edhe për propozimin e Slavko Simiq për nënkryetar, duke e cilësuar të papranueshëm.
“Slavko Simiq është autor i sulmit ndaj gazetarëve dhe ndaj mbrojtjes sime gjatë vizitës në Leposaviq. Nëse shihni profilin e tij në rrjete sociale, do të shihni se ai ka më së shumti fotografi me terroristin Radojçiq. Ai është zëri, dora dhe syri i tij në Prishtinë. Këtë nuk mund ta pranojmë si komunitete.
Nuk besoj se Gjykata Kushtetuese mund të kërkojë nga unë apo kushdo tjetër të votojë për një person që punon ditë e natë për të minuar Republikën e Kosovës”, përfundoi ai./KosovaNews/
