Partia Demokratike e Kosovës dhe Lidhja Demokratike e Kosovës e kanë kundërshtuar raportin vjetor të Agjencisë Kosovare të Privatizimit për vitin 2021.
Dy partitë opozitare, në seancën e sotme plenare, këtë raport e quajtën të paqartë dhe pastrukturuar.
Ferat Shala nga PDK, u shpreh kritik edhe për idenë e themelimit të fondit sovran dhe marrjen e aseteve të AKP-së.
Shala: Është dokument i paqartë
“Është dokument i paqartë, i pa strukturuar, pa koncept zhvillimor. Fondi sovran në konceptin ideor të proklamuar thotë se do të grumbullojë asete e AKP-së të cilat janë të gatshme për rivitalizim, prodhim, industri dhe ekonomi. Por në esencë dhe substancën e saj, asetet themelore të saj janë ndërmarrjet publike, KEKU, Trepça, Hekurudha dhe Posta, pra po e harron AKP-në”, tha ai.
Kritika adresoi edhe deputetja e LDK-së, Valentina Bunjaku-Rexhepi.
Bunjaku-Rexhepi: Ne jemi kundër këtij raporti
“Ne si LDK jemi kundër këtij raporti dhe nuk do të marrin pjesë në votim”, tha ajo.
Ndërsa deputetja nga mazhoranca Jeta Statovci tha se AKP-ja ka bërë një punë të mirë gjatë vitit 2021 dhe raporti duhet të miratohet.
Statovci: Ka një targetim të mirë të AKP-së
“E shohim që ka një targetim mjaft të madh të nevojave se ku duhet investuar dhe reduktuar shpenzimet e panevojshme. Shohim se bordi ka marrë masa lidhur me kompensimin e anëtarëve të bordit dhe pagat e stafit të AKP-së”, tha ajo.
Pas këtij diskutimi, Kuvendi shkoi në pauzë deri në orën 14:30.