Agjencia e OKB-së për refugjatët palestinezë (UNRWA) thotë se gjashtë nga punonjësit e saj janë vrarë në një sulm ajror izraelit në një nga shkollat që ajo drejton në Gazën qendrore.
UNRWA ka thënë se ky ishte “numri më i lartë i vdekjeve në mesin e stafit tonë në një incident të vetëm” që nga fillimi i luftës midis Izraelit dhe Hamasit në tetor, raporton BBC.
Zyrtarë të Hamasit kanë bërë të ditur se 18 persona u vranë në sulmin në shkollën al-Jaouni në kampin e refugjatëve Nuseirat, i cili po përdoret si strehë nga mijëra palestinezë të zhvendosur.
Ushtria izraelite ka thënë se ka kryer një “sulm të saktë ndaj terroristëve”, duke shtuar se kishte marrë masa për të zbutur dëmet ndaj civilëve.
Ndërkaq, sipas UNRËA-s, kjo ishte hera e pestë që goditet shkolla gjatë 11 muajve të fundit.
Në korrik, 16 persona thuhet se u vranë në një sulm për të cilin ushtria izraelite tha se kishte shënjestruar disa struktura në shkollën e përdorur nga luftëtarët e Hamasit.
Hamasi i cili është cilësuar si një grup terrorist nga Izraeli, Britania e Madhe dhe vende të tjera, ka mohuar përdorimin e shkollave dhe vendeve të tjera civile për qëllime ushtarake.
Forcat izraelite filluan një fushatë për të shkatërruar Hamasin në përgjigje të sulmit të paprecedentë të grupit në Izraelin jugor më 7 tetor, në të cilin rreth 1,200 njerëz u vranë dhe 251 të tjerë u kthyen në Gaza si pengje.
Më shumë se 41,080 njerëz janë vrarë në Gaza që atëherë, sipas ministrisë së Shëndetësisë të territorit të Hamasit.
