Oda Ekonomike e Kosovës (OEK) ka paralajmëruar se do të ushtrojë kallëzim penal ndaj Zyrës së Rregullatorit për Energji (ZRRE), për siç ka thënë, moszbatim t vendimit të saj për çështjen e liberalizimit të tregut të energjisë të bizneseve.
Sipas OEK-ut Gjykata Supreme ka konstatuar qartësisht se procesi i liberalizimit të tregut të energjisë elektrike është zbatuar në kundërshtim me ligjin, pa analizë konkurrence, pa konsultime publike dhe jashtë kompetencave ligjore të rregullatorit.
Vendimi sipas tyre shfuqizon dispozitat kyçe të udhëzuesve për liberalizim dhe konstaton pavlefshmërinë e aktit njoftues.
“Oda Ekonomike e Kosovës shpreh shqetësimin e thellë për mënyrën se si Zyra e Rregullatorit për Energji (ZRRE) e ka keqinterpretuar publikisht Aktgjykimin e Gjykatës Supreme në lëndën P.A.nr.18/2025, duke tentuar të zbehë efektin e tij juridik. Ky vendim është i formës së prerë, i pakontestueshëm dhe i detyrueshëm për zbatim të menjëhershëm”, thuhet në komunikatën e OEK-ut.
Sipas OEK-ut komunikata e ZRRE-së e datës 18.11.2025, pas vendimit të Supremes, tenton ta relativizojë këtë vendim, siç thuhet, duke krijuar pasiguri të re ligjore dhe duke ekspozuar bizneset ndaj rreziqeve ekonomike dhe dëmeve të mëtejshme.
“OEK-u thekson se: Vendimi i Gjykatës Supreme është i detyrueshëm për zbatim nga çdo institucion publik.
Asnjë organ administrativ nuk mund ta interpretojë ose ta zbehë efektin juridik të këtij vendimi. Çdo veprim i bazuar në aktet e shfuqizuara bie ndesh me rendin juridik të Republikës së Kosovës. Bizneset janë dëmtuar rëndë nga një proces i liberalizimit që tashmë është konfirmuar si i paligjshëm”, thuhet në komunikatë.
Tutje thuhet se “rritja e çmimit të energjisë, kontratat e imponuara, depozitat e pajustifikuara dhe rënia e konkurrueshmërisë ekonomike janë pasoja direkte të kësaj shkeljeje ligjore”
OEK-u ka kërkuar që ZRRE-ja, brenda 5 ditësh kalendarike, të ndërmarrë disa hapa.
“Të publikojë një komunikatë të re dhe të korrigjuar mbi vendimin e Gjykatës Supreme. Të ndalojë çdo interpretim të pasaktë të vendimit. Të rikthejë bizneset e prekura në Shërbimin Universal. Të rillogarisë faturat e periudhës së liberalizimit të paligjshëm. Të zbatojë në mënyrë të plotë dhe të pakushtëzuar Aktgjykimin e Gjykatës Supreme”, thuhet në njoftim.
Në rast se brenda afatit nuk ka veprime konkrete, thuhet se OEK-u do të depozitojë kallëzim penal ndaj kryetarit të Bordit të ZRRE-së, siç thuhet, si përgjegjës për pengimin e zbatimit të një vendimi të formës së prerë të Gjykatës.
Vendimi i Gjykatës Supreme lidhur me padinë për daljen në treg të hapur të energjisë të rreth 1.300 bizneseve është interpretuar në mënyra të ndryshme nga Oda Ekonomike e Kosovës si paditëse dhe nga Zyra e Rregullatorit për Energji si e paditur.
Derisa në OEK kanë thënë se vendimi i Supremes e kthen në pikën zero procesin e daljes në treg të hapur të energjisë dhe kërkuan që të zbatohet aktgjykimi, në ZRRE kanë deklaruar të kundërtën.
