Në këto ditë të nxehta vere, kompania Rajonale “Ujësjellësi Prishtina”, po bënë përpjekje maksimale që të mos ketë reduktime të ujit të pijshëm. Në të dy liqenet akumuluese, nivel i ujit ka arritur kuotën maksimale, thotë zëdhënësja e Ujësjellësit, Arjeta Mjeku, përderisa ka bërë thirrje për shfrytëzim sa më racional të ujit të pijshëm, dhe jo keqpërdorim.
Niveli i Ujit, në të dy liqenet akumuluese: atë të Batllavës dhe Badovcit, ka arritur mbi kuotën maksimale, duke siguruar një furnizim me ujë të pijshëm deri në fund të vitit, thotë për Radio Kosovën, zëdhënësja e Ujësjellësit Rajonal “Prishtina”, Arjeta Mjeku.
Por, Mjeku thotë se duhet të ketë përdorim racional të tij, duke mos e keqpërdorur në këto ditë të nxehta për bujqësi.
“Do të tentojmë që të mos ketë reduktimeve të ujit të pijshëm, apelojmë që uji të shfrytëzohet sa më racionalisht, për pije, higjienë dhe nevoja shtëpiake, sepse ai ujë është për pije, dhe nëse dikush e keqpërdorë, atëherë mund të mos arrijë uji tek ata që jetojnë mbi kuota të larta të rezervuarëve, dhe konsumatorët mund të ndjenjë mungesë të ujit të pijshëm”, tha ajo.
Mjeku thotë se në kryeqytet nuk ka reduktime të ujit, përjashtuar disa lagje të mëdha në periferi, ku janë duke u zhvilluar punimet.
“Reduktimet i kemi në lagjen Nic, Qëndresa dhe Podujevën, ku atje bashkë me komunën, jemi duke vendosur një gyp i cili do të përmirësojë dukshëm furnizimin me ujë të pijshëm, dhe në të njëjtën kohë bashkë me Ministrinë e Infrastrukturës dhe atë të Pushtetit Lokal, shumë shpejt do të realizohen punimet që në Bardhin e Madh, nuk do të ketë probleme me furnizim me ujë të pijshëm, ndërsa impiantet në Shkabaj, Albanik dhe Badovc, janë duke punuar me kapacitete maksimale, duke siguruar një furnizim stabil”, tha Mjeku.
Ujësjellësi rajonal ka filluar edhe aksionin për shkyçjen e konsumatorëve borxhlinj ndaj kësaj kompanie, borxhi total i amvisërisë dhe bizneseve arrin mbi 45 milionë euro.
