Me rastin e shënimit të 25 Nëntorit-Ditës Ndërkombëtare për Eliminimin e Dhunës ndaj Gruas, ministrja e Arsimit, Shkencës, Teknologjisë dhe Inovacionit, Arbërie Nagavci bashkë me ministren e Drejtësisë, Albulena Haxhiu i janë bashkuar aktiviteteve të hapjes së fushatës “16 Ditët e aktivizmit kundër dhunës në baza gjinore” e cila do të shënohet deri më 10 dhjetor 2023.
Në kuadër të këtyre aktiviteteve, ministret Nagavci dhe Haxhiu kanë bashkëbiseduar me nxënësit e shkollës “Xhemajl Mustafa” në Prishtinë, për dhunën ndaj vajzave dhe grave dhe mënyrën se si duhet të adresohet ajo. Ato kërkuan që dhuna në bazë gjinore të raportohet, teksa u zotuan për përkrahje ndërinstitucionale.
Ministrja e Arsimit, Arbërie Nagavci tha se, me qëllim të parandalimit të dhunës në baza gjinore, sot në të gjitha shkollat e Kosovës do të shënohen aktivitete të ndryshme, të cilat synojnë vetëdijesimin e nxënësve kundër kësaj dukurie.
Ministrja Nagavci i ka inkurajuar nxënësit që të jenë të kujdesshëm dhe për temën e dhunës të bashkëbisedojnë hapur me bashkëmoshatarët, por edhe me mësimdhënësit, në mënyrë që të sigurohemi që klasat dhe shkollat tona, hapësirat ku fëmijët gjenden, të jenë të sigurta për secilin.
Ndërsa, ministrja e Drejtësisë, Albulena Haxhiu, tha se Ministria e Drejtësisë është duke udhehequr këtë fushatë, e cila parashihet që të organizojë mbi 80 aktivitete nëpër shkolla.
Në fund, Nagavci e Haxhiu iu përgjigjën disa pyetjeve të nxënësve të kësaj shkolle. Pyetjet kishin të bëjnë me masat që ndërmerren ndaj dhunuesve dhe përkrahjen që e marrin viktimat e dhunës.
Ministrja Arbërie Nagavci, pas bëshkëbisedimit me nxënës ka marrë pjesë edhe në aktivitetin “Ato janë Ne”, në Sheshin “Zahir Pajaziti, me ç’rast është vendosur tabela e zezë, në të cilën do të vendosen gjurmët e duarve me ngjyrë portokalli, si shenjë e kundërshtimit të dhunës me baza gjinore.
Ndërsa në sesionin informues, me fokus dimensionin digjital të dhunës ndaj vajzave dhe sigurinë kibernetike, i cili është mbajtur me nxënësit e shkollës fillore “Naim Frashëri” në Prishtinë, organizuar nga Ministria e Arsimit dhe Këshilli i Evropës, ministrja Arbërie Nagavci ka folur për rreziqet që paraqesin mediat sociale, duke përmendur disa këshilla praktike të cilat do të ndihmonin në uljen e rrezikut dhe ruajtjen e privatësisë.
Ministrja Nagavci ka thënë se, ofrimi i mbrojtjes dhe mbështetjes për vajzat është një investim tejet i vlefshëm për gjysmën e popullsisë së një vendi, i cili na siguron ndërtimin e një shoqërie të shëndoshë.
Gjatë ditës, ministrja Arbërie Nagavci ka marrë pjesë edhe në tryezën e diskutimit e organizuar nga Qendra Rinore në Vushtrri, me temën “Bashkohuni! Investoni për parandalimin e dhunës ndaj grave dhe vajzave”, ku është folur për luftën kundër pabarazisë gjinore dhe mbështetjen e shtuar për vajzat në shkollat tona.
