Në mbledhjen e sotme të Qeverisë është miratuar Projektligji për Inspektoratin e Arsimit. Ky Projektligj përcakton statusin e Inspektoratit të Arsimit në Republikën e Kosovës, kushtet dhe mënyrën e organizimit dhe funksionimit të tij, strukturat përgjegjëse, kompetencat dhe përgjegjësitë.
Si i tillë paraqet legjislacion thelbësor për funksionimin e Inspektoratit të Arsimit, sipas standardeve më të larta të kohës dhe njëkohësisht, do të ndikojë në fuqizimin e rolit të Inspektoratit, në funksion të ushtrimit të detyrave dhe përgjegjësive, e në veçanti në ngritjen dhe përmirësimin e cilësisë në arsim.
Në procesin e hartimit të këtij projektligji janë përfshirë zyrtarë nga MASHTI dhe institucioneve vartëse të Ministrisë, përfaqësues nga Fakulteti i Edukimit, zyrtarë komunal të arsimit, ekspertë vendorë, përfshirë këtu edhe ekspertë të angazhuar nga GIZ gjerman dhe nga projekti i Bashkimit Evropian KosEd.
Në frymën e adresimit të sfidave që kanë ekzistuar tashmë e disa vite në këtë komponentë të rëndësishme të arsimit, kemi paraparë disa ndryshime në këtë Projektligj si:
📌Fushëveprimi i inspektoratit;
📌Përcaktimin e statusit ligjor dhe strukturat përgjegjëse;
📌Organizimi dhe funksionimi i inspektoratit të arsimit;
📌Detyrat dhe përgjegjësitë e inspektorëve dhe kryeinspektorit;
📌Detyrat dhe përgjegjësitë e inspektorit pedagogjik;
📌Mënyra e ankimimit;
📌Rregullimi i procesit të kundërvajtjeve dhe shkeljeve disiplinore, në përputhje me legjislacionin në fuqi.
