Ministria e Kulturës e ka vlerësuar Festivalin e Këngës si ngjarje historike. “Është kthesë serioze për muzikën shqipe, duke e afruar më pranë zemrës së publikut dhe njëkohësisht, duke e shtruar rrugën për në Eurosong”, ka shkruar ministria e Kulturës në facebook.
Ministria, po ashtu ka bërë të ditur se për organizimin e këtij festivali janë ndarë 300 mijë euro, ku përmes këtij investimi po synohet promovimi i artistëve të rinj dhe i vlerave kulturore.
“Për organizimin e kësaj ngjarjeje historike e madhështore, Ministria e Kulturës ka dhënë 300.000 euro. Përmes politikave dhe investimeve të duhura si kjo, po zhvillojmë dhe promovojmë artistët dhe vlerat tona kulturore. Ngjarja është më shumë se një festival. Është shtëpia e re e artistëve. Është kthesë serioze për muzikën shqipe, duke e afruar më pranë zemrës së publikut dhe njëkohësisht, duke e shtruar rrugën për në Eurosong. Përgëzime RTK-së për organizimin fantastik dhe në veçanti drejtorit të festivalit, Adi Krasta. Falënderime për Komunën e Prishtinës për kontributin e tyre për pastrimin dhe rregullimin e sallës së madhe të Pallatit të Rinisë. Suksese të gjithë artistëve pjesëmarrës”, thuhet në postimin e ministrisë.
