Mbi 200 kamionë cisternë që transportojnë naftë dhe benzinë nga Kosova po protestojnë aktualisht në portin e Durrësit, si reagim ndaj pritjeve të gjata dhe trajtimit që ata e cilësojnë si “maltretim” në pikat kufitare.
Shoferët dhe njëri nga përfaqësuesit e bizneseve të transportit të derivateve të naftës, Liman Daka shprehën për Telegrafin shqetësimin e tyre për kontrollet e shumta dhe të përsëritura, të cilat i konsiderojnë të panevojshme dhe të paarsyeshme.
“Përkundër që gjatë rrugës na shoqëron njësia antikontrabandë, përsëri në kufi i nënshtrohemi kontrolleve të shumta – futemi në skaner, në peshore, bëhen analiza – e madje për peshoren na faturohen 11 euro pa ndonjë arsye të qartë”, thanë protestuesit.
Ata deklaruan se nuk do të lëvizin nga vendi i protestës pa u marrë masa konkrete për lehtësimin e procedurave. Shoferët paralajmëruan se me mbi 120 cisterna të ngarkuara me karburant dhe me temperaturat e larta të ditëve të fundit, ekziston një rrezik i shtuar për ndonjë incident zjarri.
Protesta po vazhdon në portin e Durrësit dhe përfaqësuesit e kompanive kërkojnë që autoritetet kompetente të ndërhyjnë me urgjencë për të zgjidhur situatën.
