Kryeministri Kurti ka përkujtuar dëshmorët e shkollës shqipe të vrarë nga policia serbe para 31 vjetësh në fshatin Uçë të Istogut, të cilët kishin dalë në mbrojtje të një grup nxënësish filloristë që po shkonin në shtëpi-shkolla për të vijuar mësimet, e të cilët u maltretuan fizikisht.
“Në 31 vjetorin e rënies së tre dëshmorëve të shkollës shqipe në Uçë. Në mëngjesin e 31 janarit të vitit 1992, teksa një grup nxënësish filloristë po shkonin në shtëpi-shkolla për të vijuar mësimet, gjatë rrugës kryesore të fshatit Uçë në Istog, ndalohen nga policia serbe. Ndaj nxënësve u ushtrua dhunë psikike përmes kërcenimeve e sharjeve. Pastaj policët serb maltretuan nxënësit edhe fizikisht.Me t’i dëgjuar britmat e nxënësve, në mbrojtje të tyre dalin banorët e shtëpive në afërsi. Pas rezistencës së tyre karshi policisë dhe kërkesës së tyre për t’i lënë nxënësit e lirë për të shkuar në shkollë, qëllohen për vdekje: Bajram Hoxhaj vdes në vend, Muharrem Hysenaj vdes rrugës për në spital e Hasan Hysenaj vdes pas disa ditësh. Të plagosur mbeten: Imer dhe Azllan Hysenaj. Gjatë ditëve në vijim, policia serbe burgosi e torturoi disa nga familjarët e të vrarëve dhe të plagosurve, ka shkruar Kurti.
Sipas tij, rënia e tre dëshmorëve në Uçë ngriti rezistencën për hapjen e shkollave shqipe, të mbyllura nga pushteti shovinist i Serbisë anembanë Kosovës.
Varrimi i tyre qe zgjim kombëtar. U nderuan me një ceremoni ku nxënësit recituan poezi në shqip, u mbajtën fjalime e u ngrit flamuri kombëtar mbi minarën e xhamisë së fshatit Uçë.
“Që nga ajo ditë, shkolla e mesme e ulët e fshatit Uçë mbanë emrin “Tre dëshmorët e shkollës shqipe”, duke e kujtuar ndër breza aktin heroik të Bajram Hoxhës, Hasan Hysenaj e Muharrem Hysenaj. Pos jetës së tyre, ata dhanë edhe kushtrimin e thirrjen kombëtare për mbrojtje të shkollës e të gjuhës shqipe”, ka thënë kryeministri Kurti.
Sot u bë përurimi i objektit të shkollës së re në fshatin Uçë. Mbanë emrin: “Tre dëshmorët e shkollës shqipe”.
