Kompania Rajonale e Ujësjellësit “Mitrovica” ka njoftuar qytetarët e Mitrovicës se situata e furnizimit me ujë të pijes është stabilizuar në pjesën me të madhe.
Kjo kompani thotë se dhe Impiantet për Trajtimin e Ujit aktualisht po operojnë me kapacitet të plotë operues.
“Ju informojmë se situata e furnizimit me ujë të pijes në zonat e shërbimit të KRU “Mitrovica” Sh.A. është stabilizuar në pjesën më të madhe dhe Impiantet për Trajtimin e Ujit aktualisht po operojnë me kapacitet të plotë operues”, thuhet në njoftim.
Megjithatë, ata u kanë rekomanduar qytetarëve që uji të mos përdoret për pije, deri sa të konfirmohet përmbushja e plotë e standardeve të cilësisë së ujit për konsum.
“Për arsye sigurie, uji nuk rekomandohet të përdoret për pije deri në njoftimin zyrtar të radhës nga ana jonë, i cili do të publikohet sapo të konfirmohet përmbushja e plotë e standardeve të cilësisë së ujit për konsum”, thuhet në njoftimin e KRU “Mitrovica”.
Në Mitrovicë pati probleme me ujin e pijes si shkak i reshjeve të dendura të shiut që sollën edhe vërshime.
