Sot, në orët e paradites, pa kurrfarë paralajmërimi, disa makineri të rënda zbarkuan në rrugicën e familjes Zyba, në fshatin Bukosh të Suharekës, aty ku e ka shtëpinë edhe deputeti i Lëvizjes Vetëvendosje, Salih Zyba.
Makineritë filluan punimet, duke e gërryer rrugën për ta shtruar me kocka.
Deputeti i Lëvizjes Vetëvendosje këtë e bëri të ditur nëpërmjet një statusi në Facebook.
Zyba ka thënë se për këtë ngjarje është njoftuar nga mediat dhe për këtë ka kërkuar nga punëkryesi që t’i prezantojë ndonjë dokument për procedurat e ndjekura. Në mungesë të përgjigjes konkrete nga punëkryesi, Zyba i është drejtuar policisë për ta lajmëruar rastin, duke thënë se nuk duhet të ketë prioritet në emër të pozitës apo autoritetit, më poshtë është reagimi i deputetit Zyba.
Sot në orët e paradites kam pranuar telefonata të ndryshme, edhe nga media, për fillimin e punimeve në ndërtimin e rrugicës që ka qasje prona dhe shtëpia e familjes sonë në Bukosh të Therandës.
Në mungesë të informatave dhe në befasi të pyetjeve, kam kërkuar informata nga punëkryesi, mirëpo as ai nuk prezentoi ndonjë dokument, pas kësaj isha i detyruar të njoftoj Policinë e Kosovës, të cilët u përgjigjen në rast.
Duke shprehur keqardhjen për të gjithë të afërmit që janë banorë dhe shfrytëzuesit e kësaj rrugice, është e papranueshme që në emër të “autoritetit dhe pozitës” të shpërfillen procedurat dhe ligjet nga organet kompetente.