Kompania për Furnizim me Energji Elektrike në Kosovë (KESCO) ka njoftuar se ka ndërmarrë të gjitha masat e nevojshme për të garantuar furnizim të qëndrueshëm me energji elektrike për konsumatorët edhe gjatë festave të fundvitit dhe natës së ndërrimit të motmoteve.
Sipas njoftimit, furnizimi po realizohet në përputhje me kushtet aktuale të sistemit elektroenergjetik dhe nivelin e konsumit, ndërsa KESCO thekson se është në koordinim të vazhdueshëm me operatorët teknikë, përkatësisht me operatorin e distribucionit dhe atë të transmisionit, për të menaxhuar çdo situatë të mundshme gjatë kësaj periudhe.
Duke marrë parasysh rritjen e ndjeshme të konsumit të energjisë elektrike gjatë festave, veçanërisht gjatë orëve të pikut në natën e ndërrimit të motmoteve, KESCO ka paralajmëruar se po monitoron nga afër rrjetin për të parandaluar mbingarkesat eventuale dhe për të reaguar në kohë nëse paraqiten vështirësi.
Po ashtu, për të qenë më afër konsumatorëve edhe gjatë natës së sotme, KESCO ka rritur kapacitetet e Qendrës së Thirrjeve, duke angazhuar staf shtesë për të ofruar informim dhe përgjigje të shpejta lidhur me furnizimin me energji elektrike.
KESCO u ka bërë thirrje qytetarëve që të tregojnë kujdes të shtuar dhe të kursejnë energjinë elektrike aty ku është e mundur, sidomos gjatë orëve të pikut, duke theksuar se përdorimi racional i energjisë ndihmon drejtpërdrejt në stabilitetin e sistemit dhe furnizimin e sigurt për të gjithë konsumatorët.
