Korporata Energjetike e Kosovës (KEK) ka njoftuar se ka arritur një marrëveshje me Sindikatën e Re të KEK-ut (SR-KEK), pas një takimi të mbajtur të hënën.
Ky zhvillim vjen pas paralajmërimit të sindikatës për grevë, e cila ishte planifikuar të fillonte më 20 nëntor 2024.
SR-KEK kishte njoftuar për grevën pas mbledhjes me punëtorët të shtunën, duke theksuar se protestat dhe ultimatumet e mëparshme për rritje pagash dhe përmirësim të kushteve të punës nuk ishin marrë parasysh.
Një protestë ishte mbajtur më 24 tetor, ndërsa një ultimatum për veprime konkrete përfundoi më 8 nëntor.
Në deklaratën e saj, menaxhmenti i KEK-ut tha se ka mirëkuptuar kërkesat e përfaqësuesve të punëtorëve dhe ka propozuar një zgjidhje që përfshin:
– Një bonus prej 200 eurosh për fundvit.
– Rritje të pagave prej 50 eurosh për të gjithë punëtorët, me efekt nga janari 2025.
Në takim, KEK-u e ka njoftuar sindikatën mbi sfidat dhe prioritetet e ardhshme të korporatës, ndërsa nga ana e saj, SR-KEK ka vendosur të pranojë propozimet dhe të ndërpresë çdo aktivitet sindikal të paralajmëruar.
“Kryesia e SR-KEK, pas shqyrtimit të çështjes me këshillin grevist, ka mirëkuptuar pozitat e menaxhmentit dhe ka vendosur të pajtohet me këtë propozim. Ata kanë treguar një qëndrim të matur, duke orientuar veprimet drejt stabilitetit dhe zhvillimit të korporatës,” thuhet në njoftimin e KEK-ut.
KEK-u gjithashtu bëri të ditur se ka planifikuar një sërë projektesh madhore, përfshirë:
– Revitalizimin dhe modernizimin e turbinave në TC-B;
– Ndërtimin e elektrofiltrave dhe sistemit DeNOx në dy njësitë e TC-B-së;
– Revitalizimin e një njësie në TC-A;
– Investime në teknologjinë e minierës;
Këto projekte synojnë përmirësimin e kushteve të punës dhe rritjen e kapaciteteve prodhuese, duke kontribuar në stabilitetin afatgjatë të sektorit energjetik të Kosovës.
