Ministrja e Arsimit, Shkencës, Teknologjisë dhe Inovacionit, Arbërie Nagavci, në kuadër të Javës së Evropës për Shkathtësitë Profesionale, ka marrë pjesë në ceremoninë e furnizimit me pajisje virtuale për praktikë në shkollën profesionale “Nexhmedin Nixha”, në Gjakovë, ndërsa ka vazhduar edhe me aktivitete të tjera në tri shkolla të kësaj komune.
Ministrja Nagavci me këtë rast ka thënë se, furnizimi me pajisje virtuale për praktikë i kësaj shkolle, do të mundësojë aplikimin e metodave më të avancuara dhe inovative të mësimdhënies dhe të nxënit në arsim dhe aftësim profesional.
“Është kënaqësi për mua të konfirmoj se në bashkëpunim me partnerin tonë ALLED 2, në një projekt të cilin e kemi dizajnuar bashkërisht, e që po mbështetet nga fondet e BE-së, pas aplikimit të suksesshëm, shkolla “Nexhmedin Nixha” është njëra nga gjashtë shkollat që kanë përfituar nga këto pajisje, përfshirë shkollën në Kamenicë, Prizren, Suharekë, Deçan dhe Ferizaj”, është shprehur ministrja Nagavci.
Nagavci gjithashtu ka theksuar se, duke ditur dobitë e shumta të AAP-së, viti 2023 është shpallur “Viti Evropian i Shkathtësive” në tërë Bashkimin Evropian, me fokus tek shkathtësitë në ekonominë digjitale dhe teknologjisë.
Ndër të tjera, ministrja Nagavci ka bërë të ditur se, përveç pajisjeve të cilat janë siguruar nëpërmjet fondeve të BE-së, së shpejti shkollat do të pajisen me mjete digjitale nga buxheti i Kosovës, ku për këtë vit janë ndarë 3 milion euro, për të vazhduar më pas me pikën e pestë të PSAK 2022-2026, e cila e ka në fokus digjitalizmin e sistemit arsimor.
Ministrja Nagavci ka folur edhe për investimet që janë bërë në këtë komunë në dy vitet e fundit, duke përmendur ndërtimin e çerdheve, shkollave, sallave të edukatës fizike, pajisjen e shkollave me kabinete, laboratore, si dhe ndarjen e mjeteve për ndërtimin e Kampusit për Universitetin e Gjakovës.
Pas ceremonisë në shkollën profesionale “Nexhmedin Nixha”, ministrja Nagavci ka marrë pjesë në ceremoninë e fillimit të mësimit për gjeneratën e 6-të të asistentëve për fëmijët me nevoja të veçanta, në shkollën “Zekeria Rexha. Aty ka folur për rëndësinë e përgatitjes së këtyre asistentëve, të cilët do t’iu vijnë në ndihmë fëmijëve dhe familjeve të tyre, për t’ua bërë sa më të lehtë procesin e mësimnxënies.
Më pas, ministrja Nagavci ka vendosur gurëthemelin e Sallës së Edukatës Fizike në shkollën “Mazllum Këpuska”, si dhe ka vizituar shkollën fillore në Ponoshec, e cila është në fazën e dytë të punimeve për ndërtimin e objektit shkollor.
